[新加坡] 新加坡植物園 Singapore Botanic Garden

講起新加坡你第一時間會諗起啲咩呢？美食？玩樂？新加坡璀璨繁華固之然無錯，不過新加坡嘅大自然亦都唔輸蝕，如果唔係就唔會有「花園城市」嘅美譽啦～今日要為大家介紹嘅係位於市區嘅新加坡植物園！呢度同濱海灣 Marina Bay 嘅Gardens by the Bay好唔同㗎～

新加坡植物園時至今日已經有近160年歷史，呢度進行過無數突破性嘅實驗，例如為蘭花配種，以至試種外國嘅橡膠樹等等。前者培植蘭花奠定蘭花喺新加坡作為國花嘅地位，而後者就令種植橡膠成為東南亞最發達嘅產業之一，所以植物園唔單止睇得，亦都好打得！2015年亦即係三年前，新加坡植物園仲納入咗世界遺產名錄，佢哋係第一個熱帶植物園入選世界遺產，亦都只係全世界第三個入選嘅植物園，同意大利嘅帕多瓦植物園以及英國嘅倫敦皇家植物園齊名～

佔地82公頃嘅植物園由多個唔同嘅部份組成，最出名嘅非國家胡姬園 National Orchid Garden 莫屬。呢個1995年先開幕嘅部份種咗過千款蘭花喺度，當中更有唔少係以貴賓嘅名命名㗎。各國元首、皇室成員或者著名演員歌手等到訪新加坡後，就有機會有蘭花係用佢哋個名㗎啦～雖然胡姬園需要收入場費，但相信你喺裡面大開眼界後會覺得物有所值～

園内仲有唔少其他景點，例如古蹟博物館、天鵝湖等等～棕櫚谷附近仲有一片大草地，唔少當地人會喺度野餐，或者睇水上舞台嘅表演，悠然自得。另外，植物園沿路都有唔少地方可以休息，唔需要怕行得太耐會辛苦。而且呢度開放時間非常長，由清晨5點開到凌晨12點，慢慢行完全唔使急～唯獨要留意新加坡天氣多變，山路等落完雨會比較濕滑，一定要注意安全！

下次去到新加坡，除咗盡情享受美食同埋四圍去玩同購物之外，不妨抽啲時間過嚟呢個城市中嘅綠洲，體驗一個不一樣嘅新加坡～唔知道大家又有無去過呢個植物園呢？有去過嘅朋友不妨喺留言同大家分享下㗎～大家如果有任何關於旅遊、行程等等嘅問題，亦都歡迎您留言或者Inbox問㗎～

新加坡植物園官網 (英文)：www.nparks.gov.sg/sbg
開放時間：05:00 至 00:00

新加坡國家胡姬園官網 (英文)：www.nparks.gov.sg
開放時間：05:00 至 00:00

入場費：
成人：新加坡元 $5
學生及60歲或以上長者：新加坡元 $1
12歲以下小童：免費入場

地址：1 Cluny Rd, Singapore
交通：乘搭新加坡地鐵 MRT 環線 (Circle Line) 或 濱海市區線 (Downtown Line) 前往植物園站 (Botanic Garden – CC19/DT9)，經A出口或B出口到地面均可直達植物園入口。​