飛行報告

[飛行報告] 新加坡航空 SQ866 新加坡-香港 商務艙

上星期同大家分享咗最近新加坡之旅去程嘅飛行報告,今個星期就先分享埋回程嘅體驗先,接住再講講酒店、美食同埋景點~

新加坡航空最近每個月都有KrisFlyer Spontaneous Escapes 呢個優惠,換特定航線嘅機票都有優惠。適逢5月份嘅優惠有香港航線嘅商務艙優惠,咁就當然把握試一試新航嘅商務艙啦~原價單程27500 KF Miles,特價7折後只係需要19250 KF Miles咋!而且航班選擇仲好多,只係唔可以揀SQ1/SQ2,所以好容易就換到飛~

若果大家有留意開唔同嘅里數計劃,或者會知道新航獎勵機票嘅限制相當嚴格。配備長途商務艙嘅航班,只能夠透過新航自家嘅Krisflyer計劃兌換,其他合作夥伴淨係換到配備區域商務艙嘅航班。所以要試到新航最好嘅產品的話,一係真金白銀俾錢,一係就要乖乖咁做新航會員密密儲分!今次搭嘅SQ866,就配備2013年推出嘅長途商務艙產品啦~雖然話就話係2013年推出,但一啲都唔會覺得佢舊或者落後。

新加坡航空 SQ866 新加坡-香港
出發地:新加坡樟宜機場 (SIN)
目的地:香港國際機場 (HKG)
出發時間:13:05
抵達時間:17:05
飛行時間:4 小時
機型:波音 777-300ER

新航嘅777-300ER機隊雖然未全部改裝成呢款新嘅客艙產品,但兩款商務艙都係以1-2-1咁排列。相較國泰嘅反魚骨式座位,呢款座位嘅私隱度就差少少,比較容易望到隔離左右位做緊啲咩或者電視睇緊咩。不過亦都因為咁,兩個人孖住坐就會Close啲,方便啲傾計~每個位都可以直達通道,亦都可以瞓平!

今次呢架飛機只係喺商務艙嘅兩側設置行李櫃,中間位要同旁邊座位嘅乘客共用行李櫃。而因為一行只有4個位,行李櫃嘅空間都夠用,唔會話要早啲上機搵位擺行李。座位本身都有唔少擺嘢嘅地方,旁邊有一格甚至大到放得落手提電腦。

呢程飛機實際嘅飛行時間大約3個半鐘左右,起飛後未即刻開始食午餐,會先派果仁同飲品~果仁烘熱咗之後幾好食,如果唔係之後要食晏嘅話應該會食晒成兜!餐牌一共有四款主菜,另外起飛前24小時或之前可以上網用Book The Cook (名廚有約) 訂餐㗎~預先訂餐有更加多唔同嘅款式,除咗海南雞飯同喇沙呢啲新加坡美食之外,仲有牛排、羊架、龍蝦呢啲揀!雖然本身機上嘅餐飲都好出色,但係都千祈唔好錯過呢個美妙嘅功能!另一個值得讚嘅地方係,雖然新加坡係用簡體中文嘅國家,但新航嘅餐牌除咗印英文之外,就係印繁體中文,尊重返香港嘅乘客。

前菜劃一係蟹肉沙律,如果唔食海鮮嘅話可能要預先睇下需唔需要訂特別餐。因為餐牌同時印咗去程同回程嘅餐牌,兩程機嘅前菜分別係蟹肉同蝦,所以可以推斷海鮮好常出現。至於主菜我就揀預先訂咗Classic Lobster Thermidor 烤焗龍蝦~呢道菜喺網上嘅評價非常高,可以話係必點嘅主菜之一。呢道法國菜嘅酒味頗濃,未必係人人都習慣嘅味道,所以大家點嘅時候要考慮一下。至於肉質等等都非常出色,食落唔會覺得唔新鮮霉咗或者有陣雪藏味咁,所以呢味烤焗龍蝦值得推薦!

主菜之後仲有蛋糕、雪糕、芝士同埋各式生果,但因為實在太飽啦,所以唯有放棄甜品同芝士,專心嘆下茶算啦。整體成個餐飲服務都相當滿意,無咩邊一個部份要挑剔,或者可能係空姐太熱情啦~雖然我已經好飽,但佢依然好落力游說我要啲生果或者甜品,盛情難卻之下惟有要一隻甜柑啦。就算係小小嘅一隻柑,空姐都會放好喺隻碟先俾我,另外仲好仔細咁放好把刀嘅位置先離開。雖然只係好少事,但就睇得出佢哋非常嚴謹同認真。

返到嚟香港機場,停泊嘅閘口好近Immigration,所以就算係優先行李都要等一陣先有得攞,不過由落機一刻到拎埋行李過海關都未夠20分鐘,速度都算幾快。嚟到呢度,今次嘅體驗就告一段落啦!希望好快能夠再有機會體驗新航嘅商務艙,以至佢哋嘅頭等廂房啦!如果大家有任何關於旅遊、行程等等嘅問題,歡迎您留言或者Inbox問㗎~

0 個留言於 “[飛行報告] 新加坡航空 SQ866 新加坡-香港 商務艙

發表回覆

你的電郵地址並不會被公開。 必要欄位標記為 *