[新加坡] 新加坡市中心索菲特酒店 Sofitel Singapore City Centre

喺新加坡，平貴酒店嘅選擇都非常多，可以話係五花八門。舊年就曾經為大家介紹過4間新開嘅新加坡酒店，唔知道大家仲記唔記得呢？大家唔記得嘅話可以撳呢度去睇返～今次去到新加坡我就趁機揀咗其中一間嚟住啦！

Sofitel Singapore City Centre位於2016年新落成嘅Tanjong Pagar Centre裡面，喺正Tanjong Pagar 地鐵站樓上，由機場搭地鐵嚟轉一次車就到，就算去其他地方亦都四通八達。地鐵站過嚟酒店非常方便，落雨無帶遮都唔怕。同唔少位於新建高樓大廈內嘅酒店唔同，呢間酒店位處於大廈低層部分，大堂位於5樓，今次住嘅房亦都只不過喺13樓，所以景觀唔算開揚，主要都係望下街景。

Sofitel 係嚟自法國嘅奢華牌子，隸屬Accor集團，連同副牌子喺全球有過百間酒店。新加坡就有3間Sofitel系列嘅酒店，而今次住嘅呢一間就係最新開業嘅。即使佢未算開咗好耐，網上嘅評價同口碑都已經非常好，喺TripAdvisor新加坡酒店排行榜已經打入頭十位！

入住前先喺5樓大堂Check-in，辦手續嘅時候會有Welcome Drink－香茅班蘭水～涼浸浸幫大家降溫消暑！最基本房型係Luxury Room，有38平方米（409呎）大，相當闊落。房內裝潢真係好靚，我唔多介紹等大家睇相，我淨係介紹下啲特點啦！房裡面有一本獅城填色書同埋顏色筆，大家夜晚臨瞓前可以用嚟放鬆下～本書會一路傳落去俾下一位客人，話唔定可以順便交流下？！浴缸有另一本書，等大家一路浸浴一路睇㗎，所以大家喺房裡面一定唔會悶，只怕大家未享受完就要撇！

無論你係飲茶嘅朋友，抑或係飲咖啡嘅朋友，呢度都有照顧你！房裡面有成五款TWG茶包，另外仲有Nespresso咖啡機～開床服務 (Turndown Service) 亦都會另外再有茶包同小食供應，而呢啲茶包又同本身房裡面嘅有啲唔同，因為Turndown Service嘅茶包更加適合臨瞓覺前飲，無咁濃之餘，甚至有一兩款寫明可以俾小朋友飲添。個小食都睇得出花咗唔少心思，因為佢唔係原味曲奇餅或者果仁，而係有新加坡特色㗎，其中一晚係班蘭曲奇～成個Turndown Service一絲不苟，值得一讚。另一個要讚嘅地方係垃圾桶。垃圾桶都要讚？無錯，因為呢度個垃圾桶分為兩格，鼓勵大家分類回收，既唔會造成不便，亦都俾返個選擇大家。

今次無試到佢哋嘅自助早餐，希望下次有機會能夠試吓～整體來講，Sofitel喺各方面都非常出色，有充足預算嘅朋友值得嚟試下，無咁多預算嘅話亦都值得你嚟豪一次！如果大家有任何關於旅遊、行程等等嘅問題，歡迎您留言或者Inbox問㗎～

新加坡市中心索菲特酒店官網：www.sofitel-singapore-citycentre.com
電話：+65 6428 5000
參考價錢：連稅後每晚305新加坡元 (折合約港幣1840元)

地址：9 Wallich Street, Singapore
交通：乘搭新加坡地鐵 MRT 東西線 (East West Line) 前往丹戎巴葛站 (Tanjong Pagar – EW15)，經A出口到地面後轉右前行即達。​