飛行報告

[飛行報告] 國泰航空 CX739 香港-新加坡 商務艙

新鮮滾熱辣同大家分享下今次去新加坡玩嘅旅程~由今個星期起一連幾星期都會分享下新加坡唔同美食同景點,大家千祈唔好錯過啦!

既然係呢個系列嘅第一篇Blog,等我分享下今次點解會去玩啦~事緣係因為新加坡航空最近每個月都有換機票優惠,咁啱遇著有香港航線嘅商務艙特價,所以我就換咗單程由新加坡返香港啦!咁就自然要諗諗點樣去新加坡啦,好彩英航Executive Club有足夠嘅Miles (20000 Avios) 俾我換單程商務落新加坡,咁就促成咗今次嘅商務之旅啦!

既然搭商務艙,最好就當然係搭長途機嘅商務艙啦!為咗唔使咁早入機場,首選11:15出發嘅CX739,不過呢班機好多時都係用配備區域商務艙嘅波音777-300嚟飛,所以揀日子嘅時候都要左右思量一下。好彩到最後無臨時換機型,所以可以搭到A350嘅商務艙~

國泰航空 CX739 香港-新加坡
出發地:香港國際機場 (HKG)
目的地:新加坡樟宜機場 (SIN)
出發時間:11:15
抵達時間:15:05
飛行時間:3 小時 50 分鐘
機型:空中巴士 A350-900XWB

國泰A350嘅商務艙以1-2-1排列,兩個人孖住去旅行坐中間就啱晒啦~即使係咁,其實每個位嘅私隱度都唔錯,因為坐低咗之後唔係好睇到隔離位嘅。1-2-1排列嘅另外一個好處,就係每個位都直達通道,唔使跨過隔離位先出到走廊。如果搭區域商務艙嘅話,就會變成2-2-2甚至2-3-2排列,比較上遜色。

唔少航空公司都選擇只係喺A350商務艙嘅兩側設置行李櫃,營造更好空間感。不過國泰就無跟隨,所以每個乘客都有自己嘅行李櫃可以用。另外,座位嘅儲物空間充足,所以應該唔使來來回回咁開袋攞嘢嘅~

唔計地面滑行嘅時間,去新加坡嘅機程3個鐘頭鬆啲,所以起飛後會先派果仁同飲品,接住先開始午餐時間~今次嘅午餐Menu一共有3款選擇:

不論你主菜揀邊款都係得一款前菜,有齊煙三文魚同沙律。呢個時候亦都有得揀麵包,我就揀咗蒜蓉包~主菜會用車仔推出嚟俾乘客揀,所以可以睇晒唔同選項先決定食邊樣。有啲奇怪嘅係餐牌上嘅雲吞麵無喺車仔度見到,唔知道係前排客人揀晒定係無擺喺車仔呢?但係唔緊要啦,反正我最後揀咗柱候蘿蔔牛筋腩飯~之前因為喺貴賓室食咗個豐富嘅早餐,所以食埋主菜已經好飽,直接跳過咗芝士以及雪糕,齋食生果好了。整體評價呢一餐午飯,雖然菜式嘅賣相唔太討好,但味道唔錯,如果可以做齊色香味俱全就無得彈啦!

國泰喺樟宜機場係用4號客運大樓,而呢座客運大樓同其餘3座以及MRT車站都唔相通,要搭MRT出市區嘅話就要搭穿梭巴士返去2號客運大樓再行去地鐵站。現時4號客運大樓主要用戶除咗國泰之外,就係AirAsia、大韓航空同越南航空等等,一般嚟講都唔會太繁忙要排大隊過關。

今次分享住去程嘅航班先,我會繼續喺新加坡覓食同遊走不同景點,遲啲再為大家一一介紹~如果大家有任何關於旅遊、行程等等嘅問題,歡迎您留言或者Inbox問㗎~​

0 個留言於 “[飛行報告] 國泰航空 CX739 香港-新加坡 商務艙

發佈留言

發佈留言必須填寫的電子郵件地址不會公開。 必填欄位標示為 *