隔咗個4月無介紹過新酒店，今日一於為大家介紹下首爾有咩新酒店啦～
首爾今年都有唔少新酒店開張，唔單止有萬豪大幅擴張版圖，亦都有日本品牌進軍韓國市場，當然唔少得本土品牌～
今次為大家介紹5間今年2018年開業嘅酒店，有興趣住新酒店嘅話就快啲Mark低佢哋啦！
2018年1月開業
L7弘大 L7 Hongdae
L7係南韓樂天集團旗下嘅酒店，對比樂天其他品牌，L7比較新潮同親民～位於弘大嘅呢間L7已經係品牌嘅第三間酒店啦～
搭機場快線A’REX唔使轉線就可以去到弘大入口站，由出口到酒店只係1分鐘路程添咋～弘大入口站亦都係首爾地鐵2號線嘅車站，地鐵幫你接通明洞同東大門！
房間嘅款式都幾多樣化㗎，除咗雙人床同雙床房外，亦都有三人房。雙人床配單人床，又或者三張單人床都有！咁樣無論你幾多個朋友一齊去玩都有啱你嘅房型～最細嘅房型有258呎大。
地址：서울특별시 마포구 양화로 141 (141 Yanghwa-ro, Mapo-gu, Seoul)
最鄰近地鐵站：A’REX、龍山線、首爾地鐵2號線 － 弘大入口站
電話：+82-2-2289-1000
立即訂房：www.agoda.com / 酒店官網
參考價錢 (連稅)：每晚約港幣917元
2018年3月開業
RYSE – 傲途格精選 RYSE, Autograph Collection
喺L7弘大斜對面有萬豪集團旗下嘅RYSE，同樣都係今年先開業～離弘大入口站只係多幾步路，所以呢度唔特別再介紹佢嘅位置。
RYSE屬萬豪嘅傲途格精選系列，每間酒店都各自有別，各有個性。為咗配合返充滿藝術氣息嘅弘大，呢度喺設計上都落咗唔少功夫，喺呢度住一定要留意下啲藝術品！
最入門嘅Creator房型分為King Size雙人床，以及2張Double Bed嘅雙床房，前者比較大有312呎，而後者就有291呎。
地址：서울특별시 마포구 양화로 130 (130 Yanghwa-ro, Mapo-gu, Seoul)
最鄰近地鐵站：A’REX、龍山線、首爾地鐵2號線 － 弘大入口站
電話：+82 2-330-7700
立即訂房：www.agoda.com / 酒店官網
參考價錢 (連稅)：每晚約港幣1638元
2018年5月開業
首爾植物園萬怡酒店 Courtyard by Marriott Seoul Botanic Park
之前兩間首爾嘅萬怡酒店都位處於市區，而今次呢間就選址金浦機場附近嘅新發展區。新發展區正係起緊首爾植物園，據了解預計年尾左右就會開幕。
現時就只有首爾地鐵9號線服務呢區，今年稍後時間會開通埋機場快線AREX嘅車站，所以呢度會越嚟越方便！如果大家計劃緊年尾行程嘅話，就唔使擔心交通唔方便啦～
呢度嘅房比較大，最細都有323呎，而且大床房可以另外加床，即使係三人行都可以住晒一間房。訂兩間房嘅話亦都可以要求Connecting Rooms，方便照顧屋企人～
地址：서울특별시 마곡중앙 12로 10 (Magokjungang 12-ro 10, Seoul)
最鄰近地鐵站：A’REX (預定)、首爾地鐵9號線 － 麻谷渡口站
電話: +82 2-6946-7000
立即訂房：www.agoda.com / 酒店官網
參考價錢 (連稅)：每晚約港幣1285元
2018年6月開業
首爾萬楓酒店 Fairfield by Marriott Seoul
Fairfield係萬豪集團嘅另一個品牌，走實惠型嘅路線，所以即使座落永登浦旺區，每晚嘅價錢亦都幾平～
首爾嘅Fairfield係全球最大嘅Fairfield品牌酒店，一共有553間房。酒店嘅房型可以分為兩大類，低層同高層，以及雙人房同雙床房。
大家要注意返房嘅開放式間隔，未必適合朋友旅行，免得尷尬。全部房都係215呎大，係今次介紹嘅酒店之中最細嘅。
地址：서울특별시 영등포구 경인로 870 (870 Gyeongin-ro, Yeongdeungpo-gu, Seoul)
最鄰近地鐵站：KTX、京釜線、首都圈電鐵1號線 － 永登浦站
電話：+82 2-2108-9000
立即訂房：www.hotels.com / 酒店官網
參考價錢 (連稅)：每晚約港幣802元
2018年8月開業
首爾格拉斯麗酒店 Hotel Gracery Seoul
日本華盛頓酒店集團相信唔少朋友去日本都住過，華盛頓以及Gracery兩個品牌都薄有名氣，而今次Gracery就衝出日本去到首爾開酒店～
酒店位於南大門附近，離地鐵1號線以及2號線嘅市廳站7號出口大約5分鐘路程左右，亦都可以揀搭機場巴士往返機場，所以出入都交通方便！
酒店主要係三種房型，雙人房、雙床房同埋無障礙房，另外亦都可以加床變成三人房～最細雙人房就有237呎大，相對上略細，不過價錢亦都較平！
地址：서울특별시 중구 세종로 12 길 12 (12, Sejong-daero 12-gil, Jung-gu, Seoul)
最鄰近地鐵站：首都圈電鐵1號線、首爾地鐵2號線 － 市廳站
電話：隨後補上
立即訂房：www.agoda.com / 酒店官網
參考價錢 (連稅)：每晚約港幣766元
今次介紹住咁多先，下次再為大家介紹另一啲新酒店，大家記得留意啦～
0 個留言於 “[韓國首爾] 2018精選新酒店巡禮”