[韓國首爾] 美食推介 － 明洞味加本粥店

之前介紹首爾嘅時候都無咩分享過首爾美食，淨係介紹咗漢江公園嘅盤浦大橋同埋東大門設計廣場。今個星期就一於介紹下首爾美食啦！今日要介紹嘅既唔係烤肉，亦都唔係炸雞，而係粥！推薦大家朝頭早嚟呢度食粥，清淡得嚟又唔普通，因為每款粥都幾特別㗎～

早餐除咗多士麵包咖啡呢啲之外，其實都有唔少韓式早餐可以試㗎，粥就係其中一樣啦，尤其係當你喺韓國食得多濃味美食之後想清淡啲～而我就係凌晨機到埗去酒店放低行李後嚟嘅，唔太Heavy所以更早都食得落。早餐時段比較旺場，睇返其他Blog嘅分享，見到周不時都要等位，所以大家一係好似我咁超早嚟，一係就要晏些少先去啦！

味加本賣嘅當然係韓國粥啦，不過韓國粥同香港常見嘅廣東粥有咩分別呢？韓國粥比起廣東粥更稠，若果你係食慣比較稀嘅潮州粥，相信會好唔習慣。而且韓國粥比較多配菜，就好似呢度咁吖，每碗粥都另外跟咗幾款前菜。

味加本主打三款粥，香菇牛肉粥、鮑魚粥同埋人蔘雞粥。鮑魚粥係三款之中最貴，承惠10000韓圜，不過其實都唔算貴好多，因為另外兩款都已經8000韓圜，所以有興趣嘅話值得試！雖然整體價格以早餐嚟講唔算平，不過食物質素值呢個價錢，大碗粥熱辣辣，加埋芝麻之後仲更加香，都無咩可以挑剔了。要雞蛋裏挑骨頭嘅話，可能係碗粥要更大碗，等我再享受多啲囉！

大家有無食過味加本，或者任何韓國粥品呢？有嘅話歡迎大家留言分享下你哋嘅食評或者推介，等我哋一齊交流下首爾有啲咩美食不容錯過！另外，如果你有任何關於旅遊嘅問題，歡迎您Inbox我哋或者留言問，我會盡我全力解答你有嘅疑難㗎～

營業時間：每日 08:00 至 22:00

味加本粥店地址：서울특별시 중구 명동2가 2-23 2F (首爾特別市中區明洞2街2-23 2樓)
交通：
乘搭首爾地鐵4號線前往明洞站 (424)，經6號出口出站，沿商店街直行，到明洞2街路口時轉右前行。
亦可乘搭首爾地鐵2號線前往乙支路入口站 (202)，經6號出口出站，步行約5分鐘左右即達。