目的地介紹

[韓國首爾] 南山纜車 南山N首爾塔 N Seoul Tower

之前介紹過首爾地標之一嘅東大門設計廣場 DDP,而上星期又介紹咗首爾美食,今個星期就一於順便介紹埋另一個首爾地標-南山N首爾塔~雖然我有搭纜車上山,不過我就無上到塔上嘅觀景台。之但係其實圍繞住塔嘅四周都好靚㗎,所以塔下一樣影到靚相!

南山N首爾塔係由昔日嘅漢城塔 (後來改稱首爾塔) 改裝而成,喺接近40年前已經可以上塔觀光㗎啦~不過咁多彩繽紛嘅南山N首爾塔就要等到2005年先出現,亦係呢個時候先改成依家呢個名。N除咗代表南山 (Namsan) 之外,亦有New 嘅意思喺當中,象徵住首爾塔翻開新嘅一頁。塔內除咗觀景台之外,仲有其他設施㗎,有幾間餐廳、紀念品商店不在話下,南山N首爾塔仲有Hello Kitty館以及SSENTOY模型博物館,所以呢度上山除咗睇景影靚相之外,仲有其他嘢可以睇㗎!

搭完纜車上到山上仲要行一段樓梯先至到達南山N首爾塔,唔係一落車就到。沿路會見到好多嘅愛情鎖,如果大家係情侶上山嘅話,都可以考慮下入鄉隨俗喺度整個鎖㗎~自備鎖頭又得,喺附近買又得,反正連纜車站嘅舖頭都有賣愛情鎖!鎖完之後仲有唔同影相位可以慢慢影情侶相~

同一時間,南山N首爾塔係賞花賞紅葉嘅好去處嚟,唔少旅行團同自由行都會排行程嚟呢度賞紅葉㗎!今次到嘅時候雖然係5月,但都有紅葉睇,紅綠交錯,顯得紅葉更加靚,喺呢度不知不覺間就影咗好多相。喺呢度即使唔上觀景台觀光,都一樣可以輕輕鬆鬆咁消磨唔少時間,所以排行程嘅時候,連埋纜車都要預返至少個半鐘。

今次我就係臨搭飛機返香港前過嚟南山嘅,所以未見識到首爾夜景,希望嚟緊能夠再去睇睇~大家又有無去過南山N首爾塔呢?不妨喺留言同大家分享下你影到嘅靚相㗎~大家如果有任何關於旅遊、行程等等嘅問題,亦都歡迎您留言或者Inbox問㗎~

南山纜車官網 (英文):www.cablecar.co.kr
營業時間:10:00 至 23:00

南山N首爾塔官網 (英文):www.nseoultower.co.kr
觀景台營業時間:
星期日至五:10:00 至 23:00
星期六:10:00 至 00:00

南山N首爾塔地址:서울특별시 용산구 남산공원길 105 (首爾特別市龍山區南山公園街105)
交通:乘搭首爾地鐵4號線前往明洞站 (424),經4號出口出站,直行至新世界免稅店十字路口向左轉,繼續前行即可到達前往纜車站嘅玻璃電梯。

0 個留言於 “[韓國首爾] 南山纜車 南山N首爾塔 N Seoul Tower

發表回覆

你的電郵地址並不會被公開。 必要欄位標記為 *