[泰國曼谷] 美食推介 － Chef Man 文苑

仲記得之前同大家介紹過曼谷平靚正嘅船麵，今次就介紹下曼谷嘅名貴餐廳啦～雖則係高消費嘅中菜，不過價錢其實都算實惠，偶然食好少少都好吖！今個星期要推介嘅主角係粵菜館－文苑～唔好覺得山長水遠去到泰國都食中菜係傻豬豬嘅行為，因為呢度嘅中菜隨時仲做得好過我哋本土啲餐廳㗎！

文苑係曼谷出名嘅中菜館之一，其中Sathorn店更加係米芝蓮推介嚟㗎～而文苑其實只係文總餐飲集團旗下嘅其中一個牌子，佢哋另外仲有文薈、文食等嘅牌子，例如文食就係做中式自助餐嘅。主廚文偉賢其實係香港人嚟，喺泰國做中菜師傅已經30年有多，再加埋集團老闆係大名鼎鼎BTS鐵路嘅老細黃創山先生，文苑唔成功就奇怪啦～

今次去嘅就唔係Sathorn店，揀咗比較近四面佛，位於Ratchadamri嘅分店。行入去嘅路夜晚比較暗，不過周邊都係酒店同高級住宅，唔需要太擔心。餐廳有好幾間廳房，若果想要多啲私人空間嘅話可以諗諗打去訂枱問下～嚟呢度食晚飯嘅客人都幾多元化㗎，除咗本地泰國人同香港人之外，仲有日本人添！

侍應全部都係泰國人，不過餐牌有齊中英泰文，而且佢哋英文都OK，所以溝通落單完全無問題。鮑魚麵同花膠麵都好值得食，900泰銖即係港幣200幾蚊，喺香港點搵得到？不過鮑魚同花膠嘅大細就時大時細，有些少唔穩定。即使係咁，味道非常好之餘膠質又重，絕對值呢個價錢。食過應該會番尋味，囉囉攣想再去食過～唔止花膠麵同鮑魚麵好食，另外嗌嘅燒味同小菜都出色㗎，一場嚟到試多幾樣啦～

呢間係我喺曼谷嘅心水中餐廳，大家去到曼谷仲有無試過邊間中菜值得推介呢？有嘅話不妨喺下面留言同大家分享交流下㗎！另外，如果你有任何關於旅遊嘅問題，歡迎您Inbox我哋或者留言問，我會盡我全力解答你有嘅疑難㗎～

文總餐飲集團官網：www.chefmangroup.com
營業時間：
星期一至五：11:30 至 14:15 及 18:00 至 22:00
星期六及日：11:00 至 14:15 及 18:00 至 22:00

文苑 Royal Place II 分店地址地址：The Royal Place 2, Soi Mahadlekloung 2, Ratchadamri Road, Lumpini, Pathumwan, Bangkok
交通：乘搭BTS 是隆線 (Silom Line) 前往拉差丹利站 (Ratchadamri)，經4號出口出站，第一個路口右轉，沿St Regis 瑞吉酒店旁邊小路直入即達。​