目的地介紹

[日本福岡] 博多站美食推介 Station Oyster Bar

去到日本,唔一定淨係食日本菜嘅~日本嘅西餐同樣出色,而且用嘅亦都係日本本土食材,所以大家一場去到都值得試㗎~喺博多站AMU裡面,就有間連鎖生蠔吧啱大家去刷生蠔餐,而且有時仲會做半價添㗎~快啲記低呢間生蠔吧去試啦!

Station Oyster Bar係全日本最大生蠔吧集團General Oyster Group 旗下嘅品牌,全國各地一共有29間分店,佢哋仲有自家養殖場培植同生產生蠔添~除咗供應入口生蠔之外,亦會由全國各地採購牡蠣,所以每個月都有時令嘅生蠔供應!不過,傳統生蠔旺季始終係最多品種當造,亦即係每年十二月到三月左右!

餐牌除咗單點各款生蠔之外,亦都有生蠔拼盤,各種熱食,甚至係套餐都有,所以就算有朋友或者屋企人唔食生蠔都唔會無啖好食~生蠔餐牌亦都會有介紹每款生蠔嘅產地,大細以及濃淡。其實仲有一段文字詳細介紹每種蠔,但就淨係得日文,無英文翻譯。每一期推廣嘅餐牌都唔同,我去嘅時候係生蠔單點半價,而最近嗰次就好似係拼盤特價,所以要留意返最新嘅推廣~

當日供應嘅四款生蠔,分別嚟自北海道、岩手、佐賀以及三重。個人認為北海道以及三重兩款比另外兩款更好食!隨生蠔上有檸檬同醬料,加唔加視乎你個人喜好,唔加都好夠味!另外亦都嗌咗炸魚薯條、明太子煮牡蠣同埋牡蠣意粉~話晒明太子係博多名產,喺呢度食明太子料理就啱晒啦!提提大家,餐廳有收取座位費 (お席料) 每位300日圓,我唔太肯定收嘅標準係點樣,因為網上有啲嗌套餐嘅朋友係無被收嘅。

唔知道大家有無試過喺日本食生蠔呢?未嘅話就記得下次試下啦!試過嘅話又不妨分享下你哋喺邊度食吖~嚟緊仲會為大家介紹更多福岡嘅美食,大家記得千祈唔好錯過啦!大家如果你有任何關於旅遊嘅問題,亦都歡迎您留言或者Inbox問㗎~

General Oyster Group 官網 (日文):www.oysterbar.co.jp
營業時間:11:00 至 00:00 (截單時間:22:30)

地址:福岡県福岡市博多区博多駅中央街1-1 アミュプラザ博多 (AMU Hakata) 10/F
交通:乘搭JR 或 福岡地鐵空港線前往 博多站 (K11),AMU位於博多站内靠近博多口一側。​

0 個留言於 “[日本福岡] 博多站美食推介 Station Oyster Bar

發佈留言

發佈留言必須填寫的電子郵件地址不會公開。 必填欄位標示為 *