目的地介紹

[日本福岡] 博多站美食推介 牛腸鍋 もつ鍋笑楽

もつ鍋,亦即係內臟鍋,係由福岡起源嘅美食之一,所以喺福岡賣牛腸鍋嘅舖頭相當之多~既然去到福岡就當然要喺當地試吓牛腸鍋啦!今次介紹嘅 もつ鍋笑楽 同之前幾星期介紹嘅餐廳一樣,都係位於博多站AMU嘅10樓,四圍去完一日之後,返到博多站又有好嘢食!

もつ鍋笑楽係牛腸鍋名店之一,由1985年到依家大概33年歷史左右,未算係老字號。佢哋一共有4間舖頭,除咗今次講嘅博多站分店之外,天神同中洲有㗎~所以住天神嘅朋友,唔一定要搭車去博多站先有笑樂嘅分店。佢哋午巿時段亦都有供應牛腸鍋定食,晏晝去食都可以~笑樂嘅食材都值得講講,因為佢哋牛腸鍋用嘅係九州牛嘅內臟!即使係韭菜椰菜呢啲嘅配菜,佢哋都係選用返國內出產嘅蔬菜㗎!咁就應該又新鮮又地道~

點餐嘅時候,牛腸鍋係按人數而嗌嘅,如果要另外加多啲內臟或者材料嘅話就一次過嗌埋,佢哋就會將所有材料一次過砌好晒喺鍋裡面㗎啦~湯底有3種,豉油、鹽同味噌。不過一鍋只能夠揀一種味,我未試晒所以唔敢推介湯底俾大家。食得咁上下之後,大家仲可以選擇加雜燴麵或者加飯煮成雜炊㗎!

鍋內除咗牛小腸外,仲有啲其他嘅牛雜、椰菜、韭菜、牛蒡同蒜片,辣椒同芝麻可以另外再按個人喜好加。餐牌單點仲有唔同嘅美食,例如醋拌豬腸,炙燒明太子,甚至馬肉刺身等等。今次就分別加咗醋拌豬腸以及蒜鹽燒小腸。雖然笑樂係專做牛腸鍋嘅,不過其他呢啲小食都唔欺場㗎,大家咁啱有興趣嘅話不妨試下!

順帶一提,笑樂有各種語言嘅餐牌,包括繁體中文!入座嘅時候侍應都會問下你邊度嚟嘅,照直講佢哋知就OK㗎啦~大家仲有無食過邊間正嘅牛腸鍋可以同大家分享下吖?有嘅話歡迎大家喺下邊留言㗎!嚟緊仲有好多美食介紹俾大家,大家千祈唔好錯過!如果你有任何關於旅遊嘅問題,亦都歡迎您留言或者Inbox問㗎~

もつ鍋笑楽 官網 (日文):www.shoraku.jp
營業時間:
午市時段:11:00 至 15:30 (截單時間:15:00)
晚市時段:
星期日至四:16:00 至 23:00 (截單時間:22:30)
星期五、六及公眾假期前夕:16:00 至 00:00 (截單時間:23:30)

地址:福岡県福岡市博多区博多駅中央街1-1 アミュプラザ博多 (AMU Hakata) 10/F
交通:乘搭JR 或 福岡地鐵空港線前往 博多站 (K11),AMU位於博多站内靠近博多口一側。​

0 個留言於 “[日本福岡] 博多站美食推介 牛腸鍋 もつ鍋笑楽

發表回覆

你的電郵地址並不會被公開。 必要欄位標記為 *