目的地介紹

[日本福岡] 中州美食推介 bills水上公園店

之前一連幾個星期都係介紹博多站周邊嘅美食,嚟到今個星期為大家介紹下博多站以外仲有啲咩好食啦!中州一帶有唔少好嘢食㗎,先前介紹過嘅吉塚鰻魚飯啦,一蘭拉麵同埋上星期介紹嘅華味鳥,佢哋嘅總店都位於中州。不過今次就唔係介紹日本菜俾大家,今次要介紹嘅係西餐~

bills 呢間餐廳1993年喺澳洲起源,之前先後被紐約時報同泰晤士報分別推崇為全球最好食嘅早餐。除咗登陸日本之外,佢哋亦開到去英國、美國同埋韓國添!至於喺日本,東京、橫濱、大阪都搵到佢嘅分店,當然唔少得今日介紹嘅福岡分店啦~東京表參道嘅分店成日都大排長龍,嚟到福岡無咁誇張,所以梗係把握機會喺呢度試吓啦!除咗早餐之外,bills嘅Pancake亦都係招牌嚟,千祈唔好錯過~

bills嘅價位唔算平,早餐單點每人至少要預大概1000円,Full Aussie全餐就會去到2200円,飲品另外再嗌。雖然價錢稱唔上實惠,不過食物質素以至餐廳環境等等都值呢個價錢,唔係齋得個樣而唔好食㗎。官網有齊晒早午晚市同埋飲品嘅餐牌,大家去之前不妨上網睇定有咩食先,心裡面有定個預算~

今次一共試咗四款早餐,每一款都好出色,而且真係食得飽!唔好睇佢哋個樣好似好少嘢咁,食完真係飽㗎。尤其大家如果之後諗住盡情血拼嘅話,呢度嘅早餐啱晒~Pancake必嗌嘅,唔再多講了,反正就係好好食!炒蛋多士雖然聽落簡單,但炒蛋係bills嘅強項嚟,當年被推舉做「全世界最好食嘅早餐」都係靠炒蛋㗎,大家可以入嚟呢度睇睇~Full Aussie就係眾多早餐之中最豐富嘅,當然亦都有炒蛋啦!最後仲有個鹹點嘅Pancake,加咗蔥之後配埋三文魚,一啲都唔輸蝕。一齊睇睇相,由相嚟證明一下佢哋內外兼備~

四月份一連五個星期為大家分享咗唔少福岡嘅美食,唔知道大家最鐘意或者最想去試邊個呢?間間我都好鐘意,所以唔好問我鐘意邊個多啲啦~如果你都有喺福岡嘅心水食肆,不妨留言同大家分享下,等大家同埋我下次去到可以試吓~如果你有任何關於旅遊嘅問題,亦都歡迎您留言或者Inbox問㗎!

bills 日本官網 (英文):billsjapan.com
營業時間:
星期一至四及公眾假期:08:30 至 22:00,截單時間:21:00(食品),21:30(飲品)
星期五、六及公眾假期前夕:08:30 至 23:00,截單時間:22:00(食品),22:30(飲品)

福岡水上公園店地址:福岡県福岡市中央区西中洲13-1 水上公園内 SHIP’S GARDEN 1/F
交通:
乘搭福岡地鐵空港線前往 中洲川端站 (K09),由1號出口步行約5分鐘即達。
若於福岡地鐵空港線 天神站 (K08),可由12號出口步行約5分鐘即達。
乘搭西鐵100円巴士亦可,可於ACROS巴士站落車。​

0 個留言於 “[日本福岡] 中州美食推介 bills水上公園店

發表回覆

你的電郵地址並不會被公開。 必要欄位標記為 *