目的地介紹

[日本東京] 市區美食推介 West Aoyama Garden 銀座.西點

大家鐘唔鐘意食甜品呢?各式各樣嘅甜品雖然非常邪惡,但就永遠都係咁吸引,耐唔耐又會想食。今次就為大家介紹東京嘅銀座.西點!呢間喫茶店嘅各款甜品都非常出色,尤其係Pancake!大家想喺東京悠閒咁嘆下甜品嘅話,就記得Mark低呢度啦~

自1947年喺銀座開張,銀座.西點已經另外開多咗兩間喫茶店同埋一系列嘅銷售專櫃,兩年前更加嚟到香港開舖添。不過喫茶店以外嘅分店,主要都係賣餅乾同酥餅為主,無Pancake等甜品供應。今次去嘅係青山花園店,比銀座總店略大,因為多咗露天雅座嘅部份。

觀乎網上其他分享以及我嘅親身經歷,好多時都要等位先有得食,而因為呢度無限時交枱,而且不論人數按先後次序入座,所以都幾難估計要等幾耐,一定要比多些少耐性~喫茶店嘅環境相當闊落,枱與枱之間嘅距離非常充足。喺呢度傾下計,嘆茶食件餅,真係會快樂不知時日過㗎~

Pancake叫一塊又得,起雙叫兩塊都得。不過Pancake又大又厚,唔係極之大食嘅話,一個人食一塊真係夠有突,而且留返啲位試其他甜品嘛~金黃色嘅Pancake單睇外表已經好似藝術品一樣咁靚,再加上佢食落非常鬆軟,蛋味又濃郁,恐怕都搵唔到啲咩好挑剔啦。我哋一行人另外再試咗梳乎厘、忌廉泡芙同朱古力溶岩蛋糕,樣樣都非常高水準,唔係齋得Pancake一味正㗎!仲有呀,飲品可以無限添飲,咖啡同茶以外嘅都得。

唔知道會唔會咁啱你哋都有嚟過呢度嘆甜品呢,有嘅話不妨喺下面留言同大家分享下你哋嘅食後感~如果大家仲有其他喫茶店好推介,都可以分享出嚟一齊交流㗎~大家如果你有任何關於旅遊嘅問題,亦都歡迎您留言或者Inbox問㗎~

銀座.西點官網:www.ginza-west.co.jp
營業時間:11:00 至 20:00

地址:東京都港區南青山 1-22-10
交通:
乘搭東京地鐵千代田線前往乃木坂站 (C05),經5號出口 (青山墓地側) 步行約3分鐘即達。
亦可乘搭東京地鐵銀座線前往青山一丁目站 (G04),由5號出口 (青山墓地側) 步行約8分鐘即達。​

0 個留言於 “[日本東京] 市區美食推介 West Aoyama Garden 銀座.西點

發佈留言

發佈留言必須填寫的電子郵件地址不會公開。 必填欄位標示為 *