目的地介紹

[日本東京] 成田機場美食 炸豬排稻葉和幸

之前喺Instagram同大家分享過一個調查嘅結果,選出成田國際機場做全球最佳機場餐飲嘅冠軍。調查除咗考慮食物種類之外,亦都考慮埋食物嘅質素,以至實惠程度。今次一於為各位介紹下成田機場裡面好食嘅炸豬排店啦!

日本有兩間唔同嘅和幸,大家都係賣炸豬排嘅。而喺成田機場裡面嘅,係稻葉和幸,規模不及和幸大。兩間各有捧場客,不過喺機場裡面就無得試齊晒兩間,想比較兩間嘅朋友就要喺市區試和幸,嚟到機場再試稻葉和幸啦~

餐牌上固然有炸豬排,另外仲有炸蝦、炸豬肉卷同雜錦等唔同款式任你揀~豬扒亦有分種類,有厚有嫩。除咗一人前嘅套餐之外,亦都有二人套餐供應!同一般炸豬扒店一樣,套餐嘅椰菜絲、白飯同麵豉湯任添,怕你食唔落咋!帶住小朋友去旅行都無有怕,小朋友嚟到可以嗌兒童餐㗎~

豬扒等等呢啲餐我就唔多介紹啦,反正例牌都係包嗰啲嘢。特別講講二人餐啦,二人餐嗰碟炸物,有豬排、炸蝦、炸豬肉卷、炸蠔等,基本上可以試齊餐牌上嘅嘢~湯同飯亦都當然係兩份啦!有選擇困難症唔知揀邊樣好嘅話,揀呢個就唔駛煩,樣樣都有啲~

我喺成田機場淨係試過呢間炸豬排咋,唔知道大家喺成田機場仲有無啲咩食肆好推介,可以同我哋開心Share下呢?有嘅朋友不妨喺下面留言話我哋知㗎~大家如果你有任何關於旅遊嘅問題,亦都歡迎您留言或者Inbox問㗎~

和幸株式会社官網:r-wako.com
營業時間:08:00 至 21:00 (截單時間:20:30)

地址:千葉縣成田市 成田國際機場 二號客運大樓 4樓
備註:使用二號客運大樓的航空公司包括國泰航空 (CX) 、香港航空 (HX) 、日本航空 (JL) 以及HK Express (UO)​

0 個留言於 “[日本東京] 成田機場美食 炸豬排稻葉和幸

發佈留言

發佈留言必須填寫的電子郵件地址不會公開。 必填欄位標示為 *