目的地介紹

[日本三重] 名花之里(なばなの里)

大家有無去過長島渡假村玩呢?去得名古屋就記得順道去埋,雖然位於旁邊嘅三重縣內,不過搭車只係一個鐘頭左右嘅車程㗎咋~今次先為大家介紹位於園區外嘅名花之里(なばなの里)!呢度一年四季都有好多嘢睇,鐘意睇花嘅又啱,鐘意睇景色嘅又啱!

名花之里擁有全日本最大花廣場嘅美譽,早前亦喺TripAdvisor攞到由全球旅客投票選出嘅獎項~四季甚至每個月各有不同嘅主題,例如嚟緊2月就會係賞梅,3月就輪到櫻花登場!所以嚟呢度一次係唔夠㗎~

我到訪名花之里嘅時候正值夏天,所以就未睇過冬天燈祭。呢度冬天嘅燈祭非常出名,直頭應該話係四季之中嘅重頭戲,皆因喺日本國內已經連續三年成為全國No. 1嘅燈飾~今年嘅主題係熊本,熊本熊部長都會登場㗎~展期將會一路去到5月6日為止,就算你唔係嚟緊農曆新年去名古屋玩都仲有機會之後趕得切㗎!喺呢度比大家睇睇今年嘅宣傳片段先~

入場費會包括咗消費券,等你喺裡面嘅收費項目用。場內有唔少設施需要另外收費,例如秋海棠花園。諗唔到消費券點用嘅話,就直接用喺溫室啦,睇完下低嘅相你就會明白,因為實在太靚太震撼!溫室外面就係呢度夏天嘅主角,繡球花嘅主場,一整條長廊旁邊放滿各式各樣嘅繡球花,細心賞花嘅朋友恐怕要花上大半日先睇得晒啦!

如果係想去埋三井Outlet嘅話,建議大家買以下呢張巴士飛~2000円就包咗三程巴士,可以由名古屋站去名花之里,之後再去Outlet,最後直接返名古屋站。掉轉Outlet先再去名花之里都可以~咁樣就可以一次過去多個地方啦!我唔記得咗影低張飛嘅相,唯有上網搵返比大家睇。

今次為大家介紹嘅名花之里,唔知道大家鐘唔鐘意呢?尤其係計劃去長島三井Outlet嘅朋友,記得留些少時間順便去埋呢度吖~搭巴士經過去埋無蝕底嘛!如果你有任何關於旅遊嘅問題,歡迎您Inbox我哋或者留言問㗎~

名花之里(なばなの里)官網:www.nagashima-onsen.co.jp/nabana/index.html
燈祭期間開放時間:
星期一至五:09:00 至 21:00
星期六、日及指定日子:09:00 至 22:00

地址:三重縣桑名市長島町駒江漆畑270 なばなの里
交通:乘搭由名鐵巴士及三重巴士聯營的高速巴士,由名古屋站名鐵巴士中心往返名花之里約需時40分鐘,時間或會因應路況而有所增減。​

0 個留言於 “[日本三重] 名花之里(なばなの里)

發表回覆

你的電郵地址並不會被公開。 必要欄位標記為 *