目的地介紹

[日本福岡] JR農場直營 博多內野雞蛋直販所

眾所周知,日本嘅大型車站大多都會雲集唔同嘅美食名店,由早餐到午餐,再到下午茶,以至晚餐甚至係宵夜都可以一一幫你解決~今次就同大家分享下博多站内抵食嘅早餐!呢間店舖係由JR農場直營,專賣有關雞蛋嘅美食,而佢哋早餐就只賣一樣嘢,就係生雞蛋飯啦~

博多內野雞蛋直販所用嘅係福岡縣內JR農場所生產嘅雞蛋,並且強調三個原則,安心、安全同埋營養均衡。佢哋嘅直營店除咗今次介紹嘅博多站分店,仲有東京羽田機場以及赤阪區各一間。除咗售賣雞蛋飯之外,佢哋仲有親子丼、布甸同蛋撻等等嘅出品。另外仲有雞蛋賣㗎,不過受出入口檢疫所限,唔建議大家買返嚟香港。

早餐由開舖嘅8點鐘供應到11點,所以就算晏咗些少起身都仲有得食。早餐就只供應一款雞蛋飯套餐,盛惠400日圓。套餐除咗一碗白飯同一隻雞蛋,仲有麵豉湯,餐枱上亦有醃菜比你撈飯食。由點餐到上菜5分鐘都唔使,上菜嘅時候會連埋一籃雞蛋拎過嚟俾你揀,鍾意邊隻蛋就揀邊隻蛋~

枱上除咗醃菜之外,仲分別有豉油同醬汁可以加,自己為自己嘅飯調味。你鍾意豉油撈咗雞蛋先又得,豉油撈飯先又得,反正無指定食法。初初食生雞蛋嘅時候可能會有些少唔習慣,畢竟會撈到杰撻撻,不過一邊飲湯一邊食,好快就會接受到,所以第一次食嘅話千祈唔好一開始就飲晒碗湯~

圖片來源:西日本電視台截圖

去到福岡相信大家主要都係會住喺博多站周邊或者天神周邊,如果你係住喺博多站附近嘅話,就記得抽時間朝頭早食返個平靚正嘅早餐先開始你一日嘅行程啦~除咗生雞蛋飯之外,仲有其他早餐都值得大家試㗎,容我下次再為大家介紹~如果你有任何關於旅遊嘅問題,歡迎您Inbox我哋或者留言問㗎~

JR農場直營 博多內野雞蛋直販所官網:www.jrkf.jp/egg/
營業時間:08:00 至 20:00

地址:福岡縣福岡市博多區博多站中央街1-1 MING名店街內
交通:乘搭JR 或 福岡地鐵空港線前往 博多站 (K11),商店位於博多站内靠近博多口一側。​

0 個留言於 “[日本福岡] JR農場直營 博多內野雞蛋直販所

發表回覆

你的電郵地址並不會被公開。 必要欄位標記為 *