[日本福岡] 博多名代吉塚うなぎ屋 吉塚鰻魚飯

之前為大家介紹過名古屋嘅鰻魚飯三食，大家仲記得嗎？今次為大家介紹福岡嘅鰻魚飯～福岡嘅鰻魚飯無好似名古屋咁多花款，不過亦都非常優秀㗎！老字號「博多名代吉塚うなぎ屋」，喺TripAdvisor嘅福岡餐廳列表當中成萬間餐廳排全市第2位，水準毋庸置疑～佢嘅位置仲好方便，值得大家嚟試下～

博多名代吉塚うなぎ屋喺明治六年，亦即係1873年就開始營業，後來先至搬到中洲現址。佢哋無其他分店，就只有本店一間。不過無論你由博多或者天神過嚟都相當方便，運河城更加只係隔咗條河，最啱Shopping後嚟開餐！

吉塚鰻魚飯嘅舖頭自己包辦一幢大廈，地下只係入口，樓上先至係用餐嘅部份。二樓嘅大堂無獨立間隔，亦都唔係榻榻米地板。三樓就由幾個廳房組成，亦都因為用上榻榻米，所以需要除鞋，兩者各有好處。呢度嘅人潮可以話相當唔穩定，有時非繁忙時間都好多人排大隊，有時就繁忙時間都唔使等位，所以大家可能要比啲耐性，或者少許運氣～

除咗日文餐牌之外，另外亦有英文以及簡體中文嘅餐牌，唔使擔心睇唔明。而且每款飯嘅份量都有清楚標示，會知道每款飯跟幾多件鰻魚。至於揀邊款好就視乎你自己喜好啦～用秘製醬汁燒嘅鰻魚非常好食，表面有少少脆，而裡面就好滑，即係外脆內軟！跟餐仲會有鰻魚肝湯，極之清澈，而且唔會有腥味，相信平日唔多食內臟嘅朋友都會接受得到。

難得一場嚟到，當然要試下正宗嘅鰻魚飯啦！尤其係當今次推介嘅博多名代吉塚うなぎ屋喺一個咁方便嘅位置，更加無理由路過都唔試下㗎嘛～雖然鰻魚飯嘅價錢唔算親民，但偶然豪食一餐都無所謂啦！如果你有任何關於旅遊嘅問題，歡迎您Inbox我哋或者留言問㗎～

博多名代吉塚うなぎ屋官網：yoshizukaunagi.com
營業時間：11:00 至 21:00 (截單時間：20:30，逢星期三休息)

地址：福岡縣福岡市博多區中洲2丁目8番27号
交通：乘搭福岡地鐵空港線前往 中洲川端站 (K09)，經5號出口步行約3至5分鐘即達。