目的地介紹

[英國倫敦] 海德公園 Hyde Park

休閒嘅星期日下午,唔知道你會選擇點樣渡過呢?有時去下公園散步都係唔錯嘅選擇嚟㗎,最好就當然多嘢睇之餘,又唔好要搭咁遠車啦。倫敦海德公園就啱晒啦,喺正市中心之餘,地方又大又多嘢睇~

海德公園最初只係一片大空地,圍封起嚟成為私人狩獵場地。直到1637年,查理斯一世先正式將公園對外開放,旋即成為大眾聚腳嘅地方~不過到呢一刻,都仲未完全係大家今日見到嘅海德公園,因為呢度地勢高低不平。之後陸續經過多年嘅設計同改造,先成為今日嘅海德公園。順帶一提,呢度亦係萬國工業博覽會嘅遺址,亦即係昔日水晶宮 (Crystal Palace) 嘅所在地。

貴為皇室御苑,呢度同皇室嘅關係當然相當密切啦。呢度多次舉辦皇室慶祝活動,例如2012年嘅時候,呢度就曾經舉辦大型慶典活動慶祝英女皇登基60週年啦。一直以嚟,海德公園除咗皇室相關嘅活動之外,舉辦過嘅慶祝活動或者大型集會都多不勝數,好彩嘅話絕對有機會參加到呢啲地道活動㗎~嚟緊聖誕節亦都有一年一度嘅冬日嘉年華,有得食又有得玩!

呢度佔地成142公頃,當然有好幾個出入口啦。要搵正門嘅話,就要經Hyde Park Corner一側嘅Queen Elizabeth Gate入公園,呢一邊除咗有玫瑰園 (Rose Garden) 之外,亦都有幾個戰爭紀念碑,都值得大家參觀。另外其他入口都各自鄰近唔同嘅地標,大家可以預先睇睇地圖睇下自己對邊部份最感興趣,規劃好行程再決定由邊一邊入場。

除咗大家睇到嘅地上建設之外,海德公園地庫其實興建咗多個停車場,服務公園嘅遊客以及鄰近居民。正正因為倫敦寸金尺土,佢哋更加要以創新嘅諗法去解決都市規劃嘅問題。既能夠將公園保留,亦都迎合到發展需要,咁先唔會側重於發展而忘記大眾利益。下次嚟到海德公園,除咗欣賞人哋嘅美景之外,你仲知道要欣賞人哋嘅規劃啦~

海德公園官網:www.royalparks.org.uk/parks/hyde-park
開放時間:05:00 至 00:00 (年中無休)
入場費:免費入場

交通:可乘搭倫敦地鐵中央線 (Central Line) 前往蘭卡斯特門站 (Lancaster Gate) 或 石拱門站 (Marble Arch),或乘搭倫敦地鐵皮卡迪利線 (Piccadilly Line) 前往海德公園角站 (Hyde Park Corner) 或 騎士橋站 (Knightsbridge)。

0 個留言於 “[英國倫敦] 海德公園 Hyde Park

發表回覆

你的電郵地址並不會被公開。 必要欄位標記為 *