目的地介紹

[法國巴黎] 艾菲爾鐵塔 Tour Eiffel

仲有唔夠半個月就踏入2018年,好快又係倒數迎接新一年嘅時間~無論上網抑或睇電視都會睇到世界各地除夕倒數嘅片段,法國嘅片段多數都係影住凱旋門,而唔係巴黎鐵塔。點解嘅?唔係巴黎鐵塔唔靚,而係除夕倒數嘅時候,鐵塔無煙花表演。即使係咁,其實都有唔少人去到鐵塔過除夕夜㗎~而且鐵塔不論日夜同四季都咁靚,非常值得大家專程到訪法國,一睹鐵塔嘅風采。

艾菲爾鐵塔嘅名字,嚟自鐵塔嘅設計師艾菲爾先生。鐵塔喺1887年開始興建,預備喺2年後,亦即係1889年嘅世博做博覽會嘅入口。世界博覽會結束之時,艾菲爾鐵塔嘅總入場人次已經接近二百萬,極受遊客歡迎。鐵塔原先只係獲准原址豎立20年,不過考慮到佢作為廣播塔嘅價值,市政府決定保留鐵塔而毋須拆卸。

巴黎鐵塔建成嘅時候,係全球最高嘅建築物,並且保持記錄長達40年。時至今日,雖然論高度,艾菲爾鐵塔已經唔再係世界第一,但係鐵塔係其他類別仲係No. 1嚟~每年接待約700萬遊客嘅鐵塔,係全球最多人到訪嘅收費地標。而佢嘅頂層觀景台依然係歐盟區內最高嘅公眾觀景台~

鐵塔設計上有一個頗為特別嘅地方,大家好容易就會忽略咗。鐵塔低層嘅四邊刻咗一共72位法國知名人仕嘅姓氏,當中包括有數學家同工程師等等。呢啲雕刻曾經喺維修嘅時候被油漆所覆蓋,不過已經修復,重新同大家見面。雖然我哋未必認識雕刻上嘅每一位名人,但係大家當欣賞下隱藏嘅小細節又有咩所謂吖?

世界各地都有唔少巴黎鐵塔嘅仿製品,近至深圳同澳門都已經有一個。你可能會疑問點解要特登去巴黎嗰個呀?我覺得大家著眼嘅唔應該只係鐵塔嘅本身,而係鐵塔同四周嘅建築,例如戰神公園同夏洛宮等等嘅融合。起初巴黎鐵塔一度被市民質疑同四周格格不入,過於前衛,甚至有人主張清拆。然而百年過去,我哋似乎再搵唔到理由去否定鐵塔嘅存在。任由你係巴黎唔同角落抬頭,艾菲爾鐵塔始終如一,代表住巴黎呢個浪漫嘅城市。

Tour Eiffel(@toureiffelofficielle)分享的貼文 張貼

遊記開首就提到鐵塔除夕夜無煙花表演啦,但係7月14日法國國慶就有煙花睇啦~大家計劃你哋鐵塔嘅行程之前,記得多睇唔同嘅資料,為自己規劃一個精彩嘅鐵塔行!如果你有任何關於旅遊嘅問題,歡迎您Inbox我哋或者留言問㗎~

艾菲爾鐵塔官網:www.toureiffel.paris/en

開放時間:
每年6月15日 至 9月1日:
09:00 至 翌日 00:45 (最後入場時間: 午夜00:00,塔頂則為 23:00)
其餘日子:
經樓梯登塔:09:30 至 18:30 (最後入場時間: 18:00)
經升降機登塔:09:00 至 23:45 (最後入場時間: 23:00,塔頂則為 22:30)

入場費:共有4款不同門票,詳情請參閱此頁

地址:5 Avenue Anatole France, 75007 Paris, France
交通:
乘搭巴黎地鐵6號線前往Bir-Hakeim站,車站指示牌有清晰標記往艾菲爾鐵塔路徑。
你亦可選乘區域快鐵(RER) 路線C前往Champ de Mars-Tour Eiffel站。

0 個留言於 “[法國巴黎] 艾菲爾鐵塔 Tour Eiffel

發表回覆

你的電郵地址並不會被公開。 必要欄位標記為 *