目的地介紹

[新加坡] 濱海灣花園 Gardens by the Bay

今日為大家介紹我其中一個最鍾意嘅景點,位於新加坡嘅Gardens by the Bay!大大話話開咗接近5年,我都係今年先專程去睇佢嘅兩個大溫室,之前只係喺外面睇過Supertree 超級樹。可以話俾你聽嘅係,睇過佢嘅兩個溫室之後,你會更加愛上呢個大花園㗎!

Gardens by the Bay 自2012年開幕到而家,一直都非常受歡迎,除咗喺Tripadvisor嘅新加坡景點之中排名第一位,佢喺Facebook年度回顧之中,更加係全球頭20位熱門打卡地點嚟~除此之外,唔同嘅遊戲同電影都會嚟呢度取景,所以喺大銀幕見到Gardens by the Bay出現都唔奇㗎~

講返兩個溫室先~分別係Cloud Forest (雲霧林) 同埋 Flower Dome (花穹),兩個都各佔地約一公頃,而花穹就係比較大嘅一個,同一時間係全球最大無柱溫室!兩個嘅展品可以話有好大嘅分別,Cloud Forest就以Cloud Mountain為主角模仿高海拔嘅環境,而Flower Dome就係由大大小小唔同嘅小花園造成,模擬嘅氣候傾向熱帶乾旱。

Cloud Forest一入場就已經係影相位,所以入場嘅位置長期都有好多人企係度影過不停,比少少耐性一樣都可以影到靚相㗎!呢條全球最高嘅室內瀑布,高35米,而你係可以上到接近頂頂望返落嚟㗎~畏高嘅朋友就要小心啦~喺呢個溫室除咗可以睇到高原地帶嘅植物之外,你亦都可以近距離睇到鐘乳石以及石灰岩,以至一啲現時變得稀有嘅植物物種㗎!較為推介大家喺日落前後到訪,配合背光影出嚟嘅相會更加靚㗎!

至於Flower Dome,除咗常設嘅八大展區之外,位於中心嘅展覽區Flower Field會根據唔同季節時令更換展品,今個月就啱啱開始咗以聖誕為主題嘅展覽~大家可以先上官網睇定有咩展覽再決定幾時去好,聖誕展覽就當然夜晚去會更有氣氛啦!今年去嘅時候正值繡球花展覽,所以就先去咗Flower Dome再到Cloud Forest。提一提大家,因為溫室嘅平均氣溫介乎23至25度,出入嘅溫差會大少少,記得帶返件外套唔好凍親呀!

戶外花園嘅超級樹每晚7:45同8:45都會有聲樂燈光匯演,嚟緊聖誕12月仲會有特別版匯演添㗎!睇完呢個之後,可以出濱海灣金沙嘅海傍睇埋Marina Bay Sands嘅「水舞間」~

鍾意植物大自然嘅朋友固之然唔可以錯過呢個大花園啦!呢度融入教育於景點之中,所以即使你本身唔多認識植物知識都唔使擔心,一樣都可以親親大自然!唔知你哋又有無嚟過呢度呢?你哋又最鍾意佢邊個部份呢?

Gardens by the Bay 官網:gardensbythebay.com.sg

開放時間:
溫室 (Cloud Forest and Flower Dome) 及 華僑銀行空中走道 (OCBC Skyway)
每日:09:00 至 21:00 (最後入場時間: 20:30,票務處於20:00截止售票)

戶外花園 (Outdoor Gardens)
每日:05:00 至 02:00 (翌日)

地址:18 Marina Gardens Drive, Singapore
交通:乘搭新加坡地鐵 MRT 環線或濱海市區線:前往海灣舫站 (Bayfront),經B出口可抵達Gardens by the Bay入口。

0 個留言於 “[新加坡] 濱海灣花園 Gardens by the Bay

發表回覆

你的電郵地址並不會被公開。 必要欄位標記為 *