目的地介紹

[加拿大溫哥華] 固蘭湖島 Granville Island

溫哥華呢三個字,我諗大家都唔陌生,尤其係有唔少香港人移居當地或者喺嗰度讀書。今次為大家介紹溫哥華其中一個非常出名嘅地方-Granville Island!呢個固蘭湖島可以話係溫哥華市內嘅重要景點之一,甚至有啲人話未嚟過呢度唔算到過溫哥華添!

Granville Island起初被用作工業用途,設立大量工廠,喺世界大戰期間更加有舉足輕重嘅作用。到後嚟工業衰落後,Granville Island進行轉型,開始設立公立市場、社區中心以及藝術發展設施等等,將半島打造成一個新社區,亦即係現時大家睇到嘅面貌。部分昔日嘅工廠並無拆除,反而被注入新嘅用途,例如成為大學校舍,保育與發展並行。

雖然佢嘅名叫做Island,不過其實佢喺填海後已經成為一個半島,三面環水。連接溫哥華南北嘅Granville Street Bridge就橫跨喺島之上,認住佢做地標就實無錯。島上現時已經有過百商戶進駐,當中不乏特色商店,就好似原住民手工藝店、啤酒餐廳同畫廊。當然唔少得喺市場裡面搵好嘢食啦!

市場裡面有非常多嘅選擇,無論你想食熱辣辣麵包意粉,抑或食新鮮海鮮都可以係呢到搵得到!仲有其他專門店可以幫襯㗎,例如湯品、芝士、蛋糕等等,喺呢度開大餐都唔成問題。而且呢度環境唔錯,喺河邊吹風慢慢嘆都係一種享受嚟~

Granville Island 近日開始有些少變化,而且亦開始計劃未來嘅發展藍圖。如果你有興趣嚟呢度參觀嘅話就記得把握機會啦~不過大家都唔駛太擔心,因為呢個地方意義重大,就連發展委員會都話會盡力保留呢個小島嘅歷史同特色~希望Granville Island 會更進一步啦~

Granville Island 官網:granvilleisland.com

地址:加拿大卑詩省溫哥華
交通:搭乘50號巴士於Anderson St.及West 2nd Ave交界巴士站落車,即達Granville Island入口。你亦可以選搭Aquabus水上巴士,或者False Creek Ferry渡輪,兩者都能夠直接到達Granville Island。

0 個留言於 “[加拿大溫哥華] 固蘭湖島 Granville Island

發表回覆

你的電郵地址並不會被公開。 必要欄位標記為 *