目的地介紹

[加拿大溫哥華] 卡皮拉諾吊橋公園 Capilano Suspension Bridge

上上星期為大家介紹過溫哥華嘅Granville Island,唔知大家鐘唔鐘意呢?今個星期就為大家介紹遠些少,位於北溫哥華市嘅Capilano Suspension Bridge!呢條橋全長140米,高約70米,曾經係全球最長嘅行人吊橋嚟㗎~一場嚟到溫哥華當然唔好錯過呢個景點啦!

吊橋嘅歷史最早可以追溯至1889年,當時係由一名蘇格蘭工程師用麻繩以及西洋杉木築起一條跨河嘅小橋,其後經歷多次轉手及重建,先至造就今日嘅呢條鋼索吊橋。由於公園屬私人擁有,因此會徵收入場費,成人收費每位42.95加幣,大約262蚊港幣左右,學生同小朋友另外再有優惠價~公園內其餘景點都值得大家睇,所以200幾蚊唔係淨係睇一條橋。

條橋雖然係以鋼索固定,但係唔好諗住好平穩呀,條橋會一路搖吓搖吓咁樣㗎,安全得嚟又有少少刺激~由於每日嚟觀光嘅人數都唔少,所以橋上周不時都好多人~雖然我嚟嘅時候落住雨,但係依然有唔少人嚟參觀!另外值得一提嘅係,若果你到訪當日落雨,呢度會提供免費嘅雨褸比大家著住四圍去參觀㗎~

圖片來源:Capilano Suspension Bridge 官網

講到最新嘅景點當然係Cliffwalk!2011年先開幕嘅呢個設施顧名思義就係喺懸崖邊嘅步行道,部分路段更加係玻璃底嚟,可以清楚鳥瞰腳下嘅景色~另一個比較特別嘅景點係Treetops Adventure,係由7條懸索橋造成,喺唔同嘅大樹之間穿插~係興建呢個設施嘅時候,園方特登以人手打造每一條橋,務求唔會因此而破壞周邊嘅樹木,抵讚!

融入自然嘅景點永遠都有佢獨特嘅魅力,Capilano Suspension Bridge 亦都唔例外。喺旅程中抽些少時間,了解當地嘅湖光山色,或者可以令你重新認識嗰一個地方,發現佢嘅另一面~下一次,不妨抽啲時間嚟呢度睇睇,感受一下溫哥華嘅自然美啦~

Capilano Suspension Bridge 官網:www.capbridge.com

地址:加拿大卑詩省北溫哥華市 3735 Capilano Rd
交通:景點全年提供免費穿梭巴士服務往返溫哥華市內4個指定地點,詳情按此。你另外可以選擇搭乘246號巴士前往Lonsdale Quay,再轉乘236號巴士前往吊橋公園。

0 個留言於 “[加拿大溫哥華] 卡皮拉諾吊橋公園 Capilano Suspension Bridge

發表回覆

你的電郵地址並不會被公開。 必要欄位標記為 *