[日本名古屋] HARBS 蛋糕專門店

HARBS相信好多人都聽過，知道係日本其中一間最出名嘅蛋糕專門店，喺關東、關西、東海，以至美國紐約都有分店。最出名嘅當然係佢哋嘅生果千層蛋糕啦！不過你又知唔知佢哋其實係由名古屋起家呢？

位於名古屋榮嘅本店，早於1981年已經開業，屈指一算已經有超過30年歷史～近年亦都好積極喺各地開分店，所以即使你去到東京大阪都可以食到美味嘅蛋糕，正如之前介紹東京六本木展望台所在嘅Roppongi Hills，都有HARBS嘅分店～喺名古屋市內嘅HARBS就分別集中喺名古屋站以及榮，有時行去附近分店可能無咁多人都唔定。

HARBS嘅蛋糕都係均一尺寸，直徑28厘米，並無分大細，所以你揀嘅只有款式同件數，無得揀Size。除咗最出名嘅生果千層蛋糕之外，每月仲有其他特別款式揀，有啲係部份分店限定，有啲就季節限定，每次去都有啲新意思！

每位最低消費係要嗌一杯飲品，基本嘅咖啡同茶固之然有，另外有果汁梳打等等可以揀。對比起蛋糕嘅價錢似乎冇咁親民，若果唔想好似套餐咁跟飲品嘅話，可以考慮買外賣返酒店嘆～價錢同堂食一樣，而且佢會幫你包裝好，加埋冰包就唔使怕會溶或者變壞啦！不過始終呢啲嘢盡快食好啲，買完就快快手食咗佢，費事有咩閃失嘥咗件蛋糕～

無論去到東京大阪抑或名古屋，只要有HARBS嘅分店都值得去食㗎！今次試咗呢幾款蛋糕，唔知道下次又會有咩驚喜等緊我呢～大家又有無食過邊款覺得好食想同大家分享下？可以喺下面留言㗎！

HARBS網站：www.harbs.co.jp

HARBS 榮本店
營業時間：
星期日 至 星期四 － 11:00 至 21:00 (Last Order: 20:30)
星期五 及 星期六 － 11:00 至 21:30 (Last Order: 21:00)
地址：愛知縣名古屋市中區神宮3-6-17 Central Park 2樓
交通：
搭乘名古屋地鐵名城線或櫻通線前往久屋大通站 (M06/S25)，步行約3分鐘即達。亦可乘搭名古屋地鐵東山線或名城線前往榮站 (H10/M05)，步行約3分鐘即達。由名古屋站到久屋大通站或榮站車程約5分鐘。

HARBS 名鐵名古屋店
營業時間：每日 10:00 至 20:00 (Last Order: 19:30)
地址：愛知縣名古屋市中村區名站1-2-1 名鐵百貨店本店 男裝館 地庫1樓
交通：由名古屋站步行前往名鐵百貨店需時約5分鐘。由榮站搭乘名古屋地鐵東山線前往名古屋站，車程約5分鐘。