目的地介紹

[日本愛知] 國寶犬山城

犬山市位於名古屋嘅西北方,只要搭名鐵特急大概30分鐘左右就嚟到呢個小城市㗎啦~今次推介大家嚟呢度睇國寶!唔係翠玉白菜呢啲國寶展品,而係國寶天守-犬山城天守。

犬山城

犬山城嘅天守屬日本100名城之一,同時係日本五個國寶天守之一,另外四個分別位於姬路城、松本城、彥根城和松江城,一嚟就已經大有來頭。再者,佢嘅天守閣據稱係現存嘅天守之中最古老嘅一個,歷史價值絕對毋庸置疑。雖然現時已經轉為法人管理,不過犬山城曾經係唯一一個由個人擁有嘅城堡,屬於成瀨家族所擁有,夾夾埋埋都幾多記錄由呢座城保持㗎!由犬山遊園落車之後,可以沿河邊行去犬山城,途中會路過犬山橋。河邊唔算多人,環境相對比較寧靜,想寫意散步嘅話相信呢度非常適合你~若果你秋天嘅時候到訪,河邊兩岸都有滿滿嘅紅葉迎接大家,未去到犬山城已經有滿滿嘅紅葉歡迎大家!順帶一提,河嘅對岸就係岐阜縣啦,世界遺產之一嘅白川鄉就喺岐阜縣啦!

犬山城北向木曾川,南向犬山城下町,故此入口設於天守嘅南面,由河邊入嚟嘅話要兜返入前門呀~一路入場期間,大家會經過護城河同兩個唔同嘅神社,接住先上到木製嘅天守。內裡亦有一棵當地人認定嘅「神木」,係樹齡大概650年嘅杉樹,比天守本體更耐歷史添!

上天守嘅時候留意要換拖鞋,因為內裡仲係原始嘅木地板,需要小心打理防止損耗。上到四樓嘅望樓可以遠眺附近嘅景色,包括剛才講對岸嘅岐阜縣,亦都可以望返入犬山市內,據聞最遠甚至可以望返名古屋市內㗎!

其實犬山城內除咗係賞楓嘅好去處之外,亦都係賞櫻嘅名勝嚟㗎!不論春天定秋天去,犬山嘅景色都一定唔會令你失望!係呢度放返張櫻花盛開嘅相比大家參考一下~2017年嘅春季,大約4月上旬左右就盛放㗎啦!

圖片來源:犬山觀光情報

回程嘅時候,大家不妨向南行經犬山城下町去車站搭車,走過昔日街道小巷,別有一番風味㗎~今次先推介住犬山城比大家賞楓先,下次再介紹其他名古屋嘅紅葉勝地比大家!如果你都有喺犬山城影過靚相嘅話,歡迎你哋同大家分享!

國寶犬山城
官網:inuyama-castle.jp/

開放時間:
平日及公眾假期:09:00 至 17:00
(16:30 為最後入場時間)
注意:12月29日至1月1日為新年假期休息,暫停開放。

犬山城入場費:
成人:550 日圓
中小學生:110日圓

地址:愛知縣犬山市犬山北古券65-2
交通:由名鐵名古屋站乘搭至名鐵特急前往犬山遊園站,車程約30分鐘,由出口步行約16分鐘可達犬山城。
你亦可選擇搭乘名鐵特急前往犬山站,車程約26分鐘,經犬山城下町步行約20分鐘亦可到達犬山城。

0 個留言於 “[日本愛知] 國寶犬山城

發佈留言

發佈留言必須填寫的電子郵件地址不會公開。 必填欄位標示為 *