目的地介紹

[日本名古屋] 鰻魚飯三食推介 - あつた蓬莱軒 及 まるや本店

名古屋嘅鰻魚飯三食可以話係名古屋嘅首本名菜,無論點樣都一定要抽至少一餐去食鰻魚飯先至啱~但係出名嘅鰻魚飯舖頭唔止一間,要試多兩間先夠滋味~今次就為大家介紹其中兩間食過嘅名店!唔難去之餘亦都係備受海內外推崇㗎~

首先講解咗鰻魚飯三食係邊三款食法先。第一味固之然係原味啦!肥美嘅鰻魚經過碳烤之後,再淋上鰻魚醬汁,唔再加額外嘅配料都已經相當美味~第二味就加入蔥花、海苔絲以山葵Wasabi 等配料撈勻嚟食,至於第三味就係加熱湯成為鰻魚泡飯。一般嚟講,一套鰻魚飯套餐可以分為四等份,所以仲可以有第四味㗎~就係將你最鍾意嘅一款再食多次encore啦!

上星期為大家介紹嘅白鳥庭園,附近就有老字號蓬萊軒 (あつた蓬莱軒) 嘅本店同分店,大家一場去到附近當然要去試下啦!不過講得係老字號又受當地人歡迎,自然就多人排隊等,所以建議大家喺相對上少人嘅時間去食,例如剛啱開門嘅11點半,或者臨近Last Order嘅時間就可以唔使等咁耐,甚至直行直入。

今次到訪比較就腳嘅神宮店,想去本店嘅朋友就要行多兩步路先去到。蓬萊軒並無咩花巧嘢吸引大家,因為蓬萊軒以正宗為傲,秉承住過去百多年嘅傳統做法。佢仲特別喺介紹中註明自己用高級嘅備長炭烤鰻魚添~

而另一間まるや本店就較多分店,除咗名古屋站有兩間分店加外賣檔之外,喺中部國際機場都有分店,臨上機之前都仲趕得切食!名鐵百貨9樓嘅分店非常旺場,即使今次下晝5點左右去到都要稍等15分鐘先能夠入座,繁忙時間更加要排大隊等超過一個鐘!如非必要都係唔好特登同人迫啦~

紫蘇葉係其中一樣まるや本店特別提供嘅配料,加入伴飯當中係另一種滋味嚟~如果閣下唔鐘意紫蘇葉嘅話就太可惜啦。不同於蓬萊軒,呢間係選用紀州高級木炭燒鰻魚嘅,所以除咗醬汁上嘅分別之外,用嘅碳亦都會影響鰻魚嘅味道。

其實兩間我都只能夠介紹下佢哋嘅特色,對於味道方面就無咩意見,因為兩間都實在太美味啦!雖然鰻魚飯唔係平,不過試多幾間係絕對值得㗎!有機會大家仲可以試下其他鰻魚飯店,比較下唔同舖頭嘅特式!食過嘅朋友都不妨分享下你哋嘅美味食評呀!

あつた蓬莱軒 神宮店
營業時間:每日 11:30 至 20:30 (14:30 至 16:30 落場休息)
休息日:逢星期二 及 每月第二及第四個星期一,若遇上公眾假期則照常營業。

網站:www.houraiken.com

地址:愛知縣名古屋市熱田區神宮2-10-26
交通:搭乘名古屋地鐵名城線前往傳馬町站 (M26),經1號出口步行約3分鐘即達。由名古屋站到傳馬町站車程約25分鐘,由榮站到傳馬町站車程約11分鐘。

まるや本店 名駅店
營業時間:每日 11:00 至 23:00 (截單時間: 22:00)
休息日依照百貨公司安排為準

網站:www.maruya-honten.com

地址:愛知縣名古屋市中村區名駅1-2-1 名鐵百貨店本館9F レストラン街
交通:由名古屋站步行前往名鐵百貨店需時約5分鐘。由榮站搭乘名古屋地鐵東山線前往名古屋站,車程約5分鐘。

0 個留言於 “[日本名古屋] 鰻魚飯三食推介 - あつた蓬莱軒 及 まるや本店

發表回覆

你的電郵地址並不會被公開。 必要欄位標記為 *