目的地介紹

[日本名古屋] 白鳥庭園

喺名古屋地鐵嘅名城線沿線,除咗上星期介紹嘅八事山興正寺係賞楓熱點之外,同樣值得推介嘅有位於神宮西站附近嘅白鳥庭園!呢度除咗日間可以睇紅葉之外,夜晚亦會點燈等大家賞夜楓㗎~

白鳥庭園建於1989年,係為配合當時名古屋主辦嘅世界設計博覽會而興建嘅展館之一,而之後正式作為景點開放就係1991年嘅事,所以白鳥庭園並未係受保護古蹟。不過設計上仍然秉持傳統日式庭園設計。整個庭園都圍繞住中心嘅大池塘,呢種設計名為「池泉回遊式」。而單計呢款設計,白鳥庭園係整個東海地區當中最大規模㗎~庭園以水為主題,同時亦以東海地區為藍本,因此庭園嘅唔同部份都有各自所代表嘅地方。例如小山丘象徵御嶽山,河流象徵木曾川,伊勢灣就有池塘作為代表。

由神宮西站行去白鳥庭園大概係10分鐘路程,行白鳥橋過河好快就到。若果搭JR去熱田站嘅話,可以考慮搭巴士 (幹神宮2、金山25、熱田巡回) 喺「白鳥橋」或者「熱田生涯學習中心」落車,咁就唔駛行咁遠啦。一日內會去埋八事山興正寺或者其他地鐵沿線景點嘅朋友,可以買返張地鐵一日券,地鐵任搭只係740日圓,好容易就慳到錢。

晚間賞楓嘅活動每年都有指定嘅期間先開放,以舊年為例,就由11月19號去到12月11號,而活動分為兩部分,前後段分別展出唔同嘅展品配合楓葉。事不宜遲,我哋即刻睇相~

白鳥庭園配合埋鄰近熱田神宮將會係一個非常適合嘅半日行程!咦?咁附近有咩食呀?下星期為大家介紹名古屋嘅鰻魚飯名店!佢哋嘅本店同分店都位於兩個景點嘅附近,食飽飽先出發睇靚景都未遲啦~記得留意啦!

白鳥庭園
官網:www.shirotori-garden.jp

開放時間:
平日及公眾假期:09:00 至 17:00 (最後入場時間: 16:30)
觀楓會開催期間:09:00 至 21:00 (最後入場時間: 20:30)

逢星期一休息 (若遇上公眾假期,則改為翌日休息),12月29日至1月3日為年末新年假期休息。

入場費:
成人:300日圓
中學生或以下:免費入場
地址:愛知縣名古屋市熱田區熱田西町2-5

交通:乘搭名古屋地鐵名城線前往神宮西站 (M27),經4號出口步行約10分鐘即達。由名古屋站到神宮西站車程約為20分鐘,由榮站到神宮西站車程則約10分鐘。

0 個留言於 “[日本名古屋] 白鳥庭園

發表回覆

你的電郵地址並不會被公開。 必要欄位標記為 *