目的地介紹

[日本名古屋] 八事山興正寺

上星期介紹過大家去位於愛知縣近郊嘅犬山城睇紅葉,今個星期我哋入返名古屋市內睇紅葉~八事山興正寺係位於名古屋市內其中一個熱門嘅賞楓地點,交通方便之餘亦都充滿特色,一定要放入行程之內呀!

八事山嘅歷史可以追溯至1668年德川家族開山祈福開始,時至今日已經有超過300年歷史。位於寺內嘅五重塔屬國家指定重要文化財產,同時亦係東海地區之中唯一以木建成嘅五重塔。屈指一算,由1808年建成到而家,五重塔已經屹立咗二百幾年㗎啦~

剛才提到交通方便呢一點,八事山興正寺嘅交通比其他紅葉場所都嚟得方便,搭地鐵去到八事站行大約5分鐘就到,唔駛再轉巴士接駁。地鐵名城線接通榮商圈之餘,仲可以順道去埋熱田神宮,一條地鐵線貫通一整日嘅行程,舒舒服服又一日!你仲可以買地鐵一日券,740日圓任搭,根據上面呢個行程話咁快就回到本!

沿飯田街道大馬路行,大約3至5分鐘就會去到興正寺嘅入口,接住會分別經過總門、參道以及中門,就會嚟到呢度嘅地標-五重塔。五重塔周邊有相當多嘅楓樹,即使未完全變紅,同綠葉互相襯托都非常靚㗎~呢度建議大家行上旁邊嘅石樓梯影全景相,睇得清楚啲又影得好睇啲。

其餘建築都圍繞住五重塔而展開,所以由中心點呢度開始行就啱㗎啦!提一提大家,由於呢度不時都有紅事白事嘅儀式進行,務必要守相應嘅禮儀,唔好打擾或者影人哋相。亦都係因為呢個原因,比較建議大家行東面多過西面,因為西面相對上多儀式進行。大家可以參考返呢張寺內地圖計劃一下。

圖片來源:八事山興正寺官網

向東行可以去到能滿堂、大日堂等嘅建築。大日堂係整個八事山之中,位處於最高嘅建築,之後就可以沿路慢慢落山,東山路徑嘅兩旁除咗秋天有紅葉睇之外,春天嚟亦都可以賞櫻,各有各靚!除咗秋天嚟睇紅葉,不妨春天都嚟拜訪~

八事山興正寺面積唔算話特別大,大家可以考慮順帶參觀熱田神宮以及白鳥庭園作為一日嘅行程。下星期就為大家介紹白鳥庭園啦,作為另一個賞楓熱點,大家一定要去睇下~記得下星期繼續留意紅葉好去處介紹!

八事山興正寺
官網:www.koushoji.or.jp/
開放時間:平日及公眾假期:09:00 至 18:00
入場費:參觀普門園每位收費500日圓

地址:愛知縣名古屋市昭和区八事本町78
交通:乘搭名古屋地鐵鶴舞線或名城線前往八事站(T15/M20),經1號出口步行約5分鐘即達。由名古屋站到八事站車程約為30分鐘,由榮站到八事站車程則約為25分鐘。

0 個留言於 “[日本名古屋] 八事山興正寺

發表回覆

你的電郵地址並不會被公開。 必要欄位標記為 *