Flyerlog 筆記

[里數] 埃及航空EGYPTAIR Plus 計劃-換領篇及總結

之前連續兩星期為大家介紹過埃及航空EGYPTAIR Plus計劃,今個星期將會同大家講埋換機票同埋其他注意事項收尾啦~如果你未睇之前幾篇介紹嘅話,最好順次序睇返之前嘅介紹,咁樣會容易啲跟住個步伐㗎!

埃及航空換獎勵機票嘅過程無其他航空公司咁方便,網上系統只能夠搵到埃及航空營運嘅航班,要換其他星空聯盟合作夥伴嘅航班就一定要打電話去換。香港現時無埃及航空嘅直航,除非你另外買飛接駁埃航嘅航班,否則相信你換埃航機票嘅機會可以話微乎其微。

大家喺打電話之前可以預先上網估算自己要用幾多里數同補幾多錢交稅同附加費,唔使到時先嚟張震撼帳單㗎~先係呢度放返張兌換表等大家心中有數要用幾多里數先換到飛。

埃及航空EGYPTAIR Plus喺兌換方面嘅價錢唔算特別優惠,中規中矩。

以來回香港美國嘅商務艙機票為例,ANA 里程俱樂部換飛只係需要 95,000里數,埃及航空EGYPTAIR Plus就收 120,000里數,加航Aeroplan同聯合嘅MileagePlus標價去到 140,000里數。雖然稱唔上抵,但起碼唔係做水魚先!喺呢度提提大家,經EGYPTAIR Plus計劃換飛係需要俾燃油附加費 (代碼: YQ)。

傳送門: www.egyptairplus.com

順便介紹咁多位用啲小工具方便計累積到幾多里數,首先有Great Circle Mapper,呢個網站可以幫大家計算唔同機場之間嘅距離,大概有個印象飛咗幾遠先,費事估算里數嘅時候估到錯晒~唔同嘅工具亦都可以計算大約嘅飛行時間,咁就可以一次過劃晒成個旅程睇下有幾Chur!

傳送門: www.gcmap.com

其次就係Where to Credit~呢個網站可以幫你一次過睇晒你張機票儲落唔同里數計劃內,分別可以累積到幾多miles,有時儲落計劃A會一分都無,但儲落計劃B就有分都唔出奇㗎!所以用呢個就可以睇得一清二楚。

傳送門: www.wheretocredit.com

總括嚟講,埃及航空呢個計劃缺點真係唔多,而且非常適合出遊次數唔算多嘅家庭。既然呢張金卡離大家嘅距離咁近,不如諗諗攞返張啦!埃及航空EGYPTAIR Plus里數計劃嘅介紹就暫告一段落,下次有機會再為大家介紹其他抵玩嘅里數計劃!

0 個留言於 “[里數] 埃及航空EGYPTAIR Plus 計劃-換領篇及總結

發佈留言

發佈留言必須填寫的電子郵件地址不會公開。 必填欄位標示為 *