目的地介紹

[韓國首爾] 漢江公園盤浦大橋

位於漢江旁邊嘅漢江公園分為十一個唔同嘅部份,今日要為大家介紹嘅係盤浦漢江公園 (반포한강공원)。

要去盤浦漢江公園一啲都唔困難,只係需要搭首爾地鐵前往高速巴士客運站,經 8-1 出口上地面直行,去到十字路口轉右,沿住盤浦大路繼續行就可以去到岸邊㗎啦。而且高速巴士客運站透過首爾地鐵 3 號綫、7 號綫或者 9 號綫分別可以直達江南、明洞及汝矣島,四通八達,非常方便。盤浦漢江公園同時接通其他位於漢江南岸嘅漢江公園,包括蠶院漢江公園,你可以由其他公園一直沿江邊行到盤浦漢江公園,渡過悠閒嘅一日。

喺呢度特別推薦你要黃昏或以後先到訪盤浦漢江公園,因為盤浦大橋喺 4 月至 10 月期間,每晚都會上演「月光彩虹噴泉」^。趁住10月仲有得睇就拿拿聲去睇啦,錯過咗就要等半年到出年4月先有。

雖然中午12點都有一場表演,但係夜晚睇會清楚得多,當然你亦都要兼顧自身嘅行程以作出調整啦。每晚 8 點正、8 點半以及 9 點正都會有長20分鐘嘅噴泉表演,部分日子會另外加開夜晚7點半同埋夜晚9點半,詳情可以睇返下面嘅時間表。喺冬季造訪首爾嘅朋友雖然無辦法欣賞「月光彩虹噴泉」,但亦都不妨去漢江公園散步,從瘋狂購物中抽離一下作休息。

時間表 (來源: 韓國觀光公社)
4月、5月、6月、9月及10月
逢星期一至星期五: 12:00 / 20:00 / 20:30 / 21:00
逢六日及公眾假期: 12:00 / 19:30 / 20:00 / 20:30 / 21:00

7月及8月
逢星期一至星期五:12:00 / 19:30 / 20:00 / 20:30 / 21:00
逢六日及公眾假期:12:00 / 19:30 / 20:00 / 20:30 / 21:00 / 21:30

^月光彩虹噴泉可能因天氣因素 (包括但不限於落雨及強風) 或其他營運原因而臨時更改表演時間或取消。

地址:首爾特別市瑞草區盤浦洞盤浦漢江公園內
交通:乘搭首爾地鐵 3 號綫、7 號綫或者 9 號綫前往高速巴士客運站,經 8-1 出口抵達地面後向十字路口方向前行,轉右沿住盤浦大路繼續前行,穿過地下隧道即達。

0 個留言於 “[韓國首爾] 漢江公園盤浦大橋

發佈留言

發佈留言必須填寫的電子郵件地址不會公開。 必填欄位標示為 *