未分類

[里數] 埃及航空EGYPTAIR Plus 計劃-累積篇

上星期為大家介紹過埃及航空 EGYPTAIR Plus 會員計劃以及當中嘅家庭計劃,如果未睇嘅話建議你睇返先睇以下嘅內容,咁樣會容易啲理解成個流程。今個星期就入正題講講點樣儲分同埋大概飛幾多次先可以攞到金卡。

由於銀卡福利唔係特別多,所以輕輕帶過就算啦。銀卡要求係需要累積滿30000里數就攞得到,之後續期每兩年累積夠15000里數就可以。第一次攞卡嘅30000里數幾乎無期限可言,用多少少時間先儲到都得。

而之後兩年15000里數更加容易,假設一家四口一齊儲落家庭戶口嘅話,每人每年大概需要賺到1875里數,全家每年來回一次東京都已經差唔多夠數,仲未計一啲短途或者仔女出國讀書儲到嘅里數添!

至於大家嘅目標-金卡方面,攞到銀卡之後需要每兩年儲30000里數。如果只係一個人去旅行無公幹嘅話就話難啫,集全家之力就唔同講法啦!每年每人需要儲大約3750里數。咁點樣先飛到咁多呀?今朝為大家介紹嘅北歐航空優惠,同埋加拿大航空嘅優惠都啱用!

而加拿大航空飛溫哥華為例,機票艙位係K,累積到半額50%嘅飛行里數,每人來回可以累積到大約6000里,淨低6000里數第二年飛轉日韓又搞掂啦~

優惠詳情:加拿大航空Early Bird優惠 來回溫哥華連稅3878元起

至於北歐航空來回斯德哥爾摩嘅優惠,機票艙位係T,可以累積全額100%飛行里數,來回每人已經儲到10000里,一次家庭旅行已經夠晒數啦!

優惠詳情:北歐航空極光季優惠 直航來回斯德哥爾摩連稅3844元起

埃及航空呢個計劃比起其他星空聯盟計劃嘅要求都相對較低,例如美國聯合航空嘅計劃就需要每年儲滿50000資格里數,而且無得合併全家計算,邊個計劃輕鬆啲顯然易見~喺呢度順便擺幾間大家較常搭嘅航空公司佢哋嘅累積表俾大家睇睇~

今次講住咁多先,下個星期再為大家介紹埋剩低換飛流程同埋一啲有用嘅工具幫大家輕鬆計里數。

0 個留言於 “[里數] 埃及航空EGYPTAIR Plus 計劃-累積篇

發表回覆

你的電郵地址並不會被公開。 必要欄位標記為 *