目的地介紹

[日本川崎] 藤子·F·不二雄博物館

今日係2017年9月3日,除咗係叮噹 (多啦A夢) 嘅生日之外,亦都係藤子·F·不二雄博物館開幕6週年嘅大日子!生日快樂呀!藤子·F·不二雄博物館位於神奈川縣嘅川崎市,係藤子先生生前居住嘅城市。叮噹誕生前100年祭嘅時候,叮噹亦都已經預先獲頒川崎市市民身份,所以川崎市同藤子先生嘅創作有著密不可分嘅關係。

博物館嘅門票係採用預售嘅形式發售,博物館自己係無售票處!若果你想嚟參觀嘅話,需要預先透過Lawson便利店嘅票務系統買飛。操作機器嘅流程可以睇呢個網站。網上亦都有其他第三方代購門票,唔想麻煩自己整嘅話可以上網搵代購~

雖然博物館位於川崎市内,不過其實由東京市區搭車去唔係想像之中咁遠,由新宿出發大概20分鐘左右就會去到登戶站,計埋搭穿梭巴士嘅10分鐘車程,大約半個鐘就會去到。影相位由你到達登戶站開始已經四圍都係,路邊有唔同卡通人物嘅雕塑,而接駁巴士亦都一共有4款唔同卡通人物主題。周圍睇下影下好快就有車嚟,10分鐘嘅車程亦都好快過,話咁快就去到博物館㗎啦~

博物館喺紀念呢位一代漫畫家嘅同時,同樣係為咗延續先生於漫畫中所傳達嘅正面理念而努力。博物館喺設計方面落足心思,喺戶外排隊入場嘅時候,旁邊嘅牆有唔同嘅小型櫥窗展覽,少量磚頭亦有特別設計,唔好掛住撳電話而睇漏眼啊!

樓高三層嘅藤子·F·不二雄博物館,當中一樓及二樓嘅一部分都係展覽館,展出作者先生嘅生平,珍藏手稿以及不同嘅相關擺設。大家記得展館內係唔可以拍攝,所以呢部份唔能夠透過相片同大家分享,大家一定要自己爭取時間行展覽。

二樓嘅另一部分由幾個小部分組成,分別有小型影院播放短篇卡通片,漫畫區齊集藤子·F·不二雄創作嘅漫畫系列,另外仲有小朋友嘅玩樂天地以及巨型扭蛋機等等。再上一層嘅三樓就相信係大朋友小朋友都啱嘅戶外影相區以及博物館餐廳啦!戶外影相區還原咗多個著名嘅場景,大雄常常去玩嘅空地水管同胖虎跌落樵夫之泉變靚仔等等都有㗎!由於呢度每個場景都係影相位,大家係影相嘅同時都千祈唔好忘形,記得跟住其他人排隊做個好遊客。

博物館時不時都會更新主題,例如今個月係開館6週年嘅展覽,會增加一啲期間限定嘅展品。唔同角色生日嘅時候亦都會成為博物館當月嘅主角,例如6月嘅時候係胖虎生日,餐廳會推出限定嘅角色造型菜式㗎!若果你特別鍾意胖虎嘅話,就記得6月去朝聖啦!

雖然東京大都會非常精彩,但周邊嘅近郊地區亦都收埋好多值得你到訪嘅地方,例如藤子·F·不二雄博物館。話唔定呢度除咗喚起你童年回憶嘅同時,仲會發掘到你嘅新喜好呢!

藤子·F·不二雄博物館
官網:fujiko-museum.com

開放時間:
平日及公眾假期:10:00 至 18:00 (分4個入場時段: 10:00, 12:00, 14:00 及 16:00)
注意:逢星期二休館,年末年頭為新年假期休館。

入場費:
成人:1000 日圓
中學生:700日圓
小學生 (4歲或以上):500日圓
3歲以下小童:免入場費

地址:神奈川縣縣川崎市多摩區長尾2丁目8番1號 〒214-0023
交通:乘搭小田急小田原線由新宿前往登戶站,住宿橫濱的話,則搭乘東海道本線往川崎站轉乘JR南武線往登戶站。登戶站有收費穿梭巴士往返博物館,約10分鐘一班。你亦可以搭乘小田急小田原線到向丘樂園站步行約15分鐘前往博物館。

0 個留言於 “[日本川崎] 藤子·F·不二雄博物館

發表回覆

你的電郵地址並不會被公開。 必要欄位標記為 *