目的地介紹

[日本東京] 六本木新城 Tokyo City View

六本木一帶唔單止酒吧夜店居水馬龍,六本木新城亦同樣受歡迎,今日就為大家介紹六本木新城以及位於52樓嘅 Tokyo City View 觀景台。

六本木新城係千禧年後嘅大型發展項目,除咗有高級寫字樓之外,亦有5星級嘅東京君悅酒店進駐,而低層嘅商場亦有唔少名店及美食,所以大家可以先填飽肚,再上觀景台睇靚景。

商場內嘅美食當然唔少得日本料理,由較經濟嘅拉麵同茶漬飯,到預算稍高嘅江戶壽司同燒肉等都有。西餐、韓國菜及中餐亦有相當數量嘅舖頭可以揀,價錢同樣豐儉由人。食完晚飯之後有時間可以順便去著名嘅糕點店 HARBS 食返件蛋糕先,話晒一場嚟到附近嘛!不過由於部分蛋糕非常受歡迎,較夜嘅時間未必仲有供應,所以唔建議大家臨近Last Order 先去呀。

圖片取自Tokyo City View 官網

講咗咁耐,我哋而家入正題講返 Tokyo City View 觀景台先。商場內嘅指示牌有標記住通往觀景台售票處嘅方向,所以唔太難搵,喺呢度就唔多講解啦。 Tokyo City View 觀景台雖然標榜360度景色,但要注意返有少部分地區屬於咖啡店嘅範圍啊;另外仲要注意雖然觀景台係能夠目視富士山,但係夜晚或者能見度較低嘅時候,亦都無辦法睇到㗎,若果你嘅目標係希望睇埋富士山嘅話,就記得留意返時間同天氣啦。

52樓出𨋢後首先入眼簾嘅係港區嘅景色,包括東京嘅地標 ── 東京鐵塔。筆者今次去嘅時候遇著東京鐵塔節能而無點燈,所以大家可能唔係好睇得清楚鐵塔,不過綜觀其他網友影出嚟嘅相,鐵塔係非常之突出㗎,所以千祈唔好比我影嘅相嚇親啊!

行過些少就會望到東京灣嘅景色,台場、Tokyo Gate Bridge (東京ゲートブリッジ) 以及羽田機場等亦會日日係你眼前呈現。沿著建議路徑繼續行,將會係橫濱、澀谷同新宿嘅夜景,日間嚟觀景台亦會喺呢個方向見到富士山!沿路有唔少嘅位置適合大家坐低休息,所以大家不妨放慢步伐,慢慢咁欣賞將五光十色嘅東京。

營業時間:
星期日至星期四及公眾假期:10:00 至 23:00 (22:30 為最後入場時間)
星期五、六及公眾假期前夕:10:00 至 翌日01:00 (午夜為最後入場時間)

入場費:
成人:1800 日圓 (預先於便利店購票可享優惠價每人 1500日圓)
65歲或以上長者:1500日圓
高中及大專學生:1200日圓
兒童 (4歲至初中):600日圓

地址:東京都港區六丁目10番1號 六本木新城森大樓 52樓 〒106-0032
交通:乘搭東京地鐵日比谷線前往六本木站可從出口1C直達六本木新城,而乘搭都營大江戶線前往六本木站,則由出口3步行約5分鐘即達。

0 個留言於 “[日本東京] 六本木新城 Tokyo City View

發表回覆

你的電郵地址並不會被公開。 必要欄位標記為 *