目的地介紹

[日本名古屋] 金城埠頭 磁浮·鐵道館

先講返些少歷史背景,日本JR集團自上世紀分拆以後,各自成為所屬地區嘅鐵路公司。名古屋屬東海地區一部分,所以亦係JR東海服務範圍之一。JR東海雖然營運嘅路線總長度較短,但就掌握住連接東京-名古屋-大阪嘅東海道本線以及東海道新幹線,故此係最賺錢嘅JR公司之一。係獲利嘅同時,JR東海亦都積極投資於社會以及未來,今次介紹嘅磁浮·鐵道館就係由JR東海設立嚟保存過去嘅回憶,同時宣傳旗下研究當中嘅磁浮列車技術,集過去及未來於一體。

成個磁浮·鐵道館樓高兩層,地面一層停泊嘅都係真實嘅列車車卡,除咗較新嘅新幹線車卡之外,部分上世紀嘅舊火車車卡亦開放參觀,大家不妨比較下新舊嘅差別,亦都可以一窺舊時車廂內嘅境況。

當中比較特別嘅,喺以下呢張相嘅餐卡。呢個車箱有兩層,下層廚房上層餐廳。唔好睇呢個餐卡好似無咩特別咁,旁邊有當年嘅菜單比各位睇返呢個餐卡係食啲咩㗎,每一個細節都呈現返係你面前。

兩側嘅展覽亦都不容錯過㗎!在來線 (向內的意思,即舊有路線) 嘅一邊,除咗設有模擬駕駛器之外,仲有一個迷你嘅鐵路模型。呢個模型涵蓋嘅範圍由東京經名古屋去到大阪,齊集各城市嘅地標,由一架架迷你嘅火車仔貫穿各地,配合埋燈光同聲音效果,影相拍片同樣咁適合!而另一邊就有介紹新幹線路軌及技術等等嘅展品以及展板,亦都放置咗一部自動售票機以及出入閘機,比各位印返一張有你自己名嘅紀念車票,呢張就係我嘅車飛啦!

館內設有在內線及新幹線兩款模擬器,入館時派嘅小冊子會有兩張飛仔,記得要放入啱嘅抽獎箱,等指定時間抽籤公佈結果。兩款模擬器劃一收費500日圓一次,非常抵玩㗎,話晒唔係咁易搵到模擬器試揸新幹線!不過今次我就抽唔中,無辦法試玩啦!

上層設有兒童遊樂區以及休息室,帶埋小朋友嚟嘅話可以嚟呢度放電休息。旁邊仲有個歷史館以及小型戲院,前者介紹日本鐵道歷史,後者就播放JR東海過去多年製作過嘅廣告。雖然上層無下層咁吸引眼球,不過仍然值得你行多兩步路,睇多幾件展品㗎!

下次去到金城埠頭呢一區,除咗去宜家當紅嘅日本LEGOLAND之外,記得留啲時間去親身體驗一下由古到今嘅日本鐵道史啦!

開放時間:
平日及公眾假期:10:00 至 17:30 (17:00 為最後入場時間)
注意:逢星期二及公眾假期翌日休館,12月28日至1月1日為新年假期休館。

入場費:
成人:1000 日圓
中小學生:500日圓
兒童 (3歲或以上未入讀小學):200日圓

地址:愛知縣名古屋市港區金城埠頭三丁目2番2號 〒455-0848
交通:由名古屋站搭乘青波綫至終點站金城埠頭站 (全程約24分鐘),由出口步行兩分鐘即達。指定日子亦有提供直通巴士服務往返名古屋中部國際機場及長島溫泉,詳情可參閱以下網站。
http://www.sanco.co.jp/foreign/chinese-han/airportbus/ ([高速巴士] 桑名 ⇔ 新特麗亞中部國際機場)

0 個留言於 “[日本名古屋] 金城埠頭 磁浮·鐵道館

發表回覆

你的電郵地址並不會被公開。 必要欄位標記為 *